新加坡總理李顯龍去年表明，將喺今年11月卸下執政黨領導人職位，由副總理黃循財接棒，黃循財將成為新加坡自1965年獨立以來第4位總理。喺此敏感時期，新加坡政府首次引用《防止外來干預法令》，將同北京關係密切嘅新加坡籍港商陳文平，列為「具政治影響力者」，指佢有可能受外國影響，嘗試影響新加坡政治。

《自由亞洲電台》報道，新加坡內政部上星期五（2日）發佈新聞稿，指經過內政部旗下嘅外國同政治資訊揭露註冊處處長評估後，陳文平有容易受到外國影響嘅傾向，亦願意促進呢啲勢力嘅政治利益，「考慮公共利益，有必要對佢採取防止外來干預法令」。新聞稿中冇指明陳文平受到邊個外國勢力影響，但相信係指中國。

今次喺去年12月法令生效以來，新加坡政府首次向個人發出「認定目標通知書」，將陳文平列為「具有政治影響力者」。該法令旨在抵禦外來敵意勢力透過宣傳，或當地代理人嚟干預新加坡內政。此舉表示陳文平要每年向新加坡當局披露1萬美元或以上嘅政治捐款，同時申報佢嘅外國關係同任何移民福利，例如：是否持有外國護照、喺外國工作或永久居留嘅許可等。

今年59歲，已歸化新加坡嘅香港商人陳文平，任職多間房地產公司高層，活躍於新加坡政商界同埋當地港人移民圈子，除咗係啱啱辭任嘅新加坡香港商會會長，同時亦擔任移民團體新加坡九龍會會長。

陳文平同中國同香港政商界有緊密聯繫。據新加坡《海峽時報》報道，陳文平喺2023年3月受邀以「全國政協海外列席代表主席」身分參加「兩會」，為30人代表團之一。喺北京期間，陳文平接受中國《華人頭條》專訪時表示，「各界僑胞代表可以組織一個聯盟…增進僑胞間友誼，凝心盡力為講好中國故事貢獻力量」。

陳文平於1964年喺香港出世，六兄弟中排行第五，一家八口喺石硤尾廉租屋長大，升中試成績唔理想，就出社會做嘢。19歲時做船務公司，到26歲得到機會喺新加坡工作，幫手開設船務分公司。喺新加坡期間結識新加坡居民嘅太太，從此喺度扎根，育有兩名兒子。

陳文平喺新加坡嘅發展期間，遇上亞洲金融風暴，失業之後轉行做地產銷售，而家係施誠地產集團總裁，同埋房地產投資公司群益私人物業有限公司同文威投資有限公司嘅執行董事。佢亦係中連教育諮詢公司嘅創始人，同深圳大學攜手合辦嘅「通識中國」證書。

呢個項目旨在俾身處東南亞嘅「華二代」、「華三代」或同中國業務有關嘅外國人「收穫新時代中國各方面的全新資訊和深刻見解，感受真實的中國面貌」。。

新加坡記者上星期五晚聯絡到陳文平，佢確認自己收到新加坡當局通知，但「一頭霧水，會先了解法例，睇睇需要做咩，再進行回覆」。佢將有14日時間向內政部註冊官提交陳情，覆核裁決。

中國外交部發言人周一（5日）回應《海峽時報》詢問時表示，陳文平作為香港新加坡商會會長，為促進香港同新加坡嘅合作做出咗貢獻。外交部重申，「中方一貫不干涉別國內政，無意就此事發表評論。」

財經分析員利世民分析指出，內政部喺聲明中明確指名陳文平受外國勢力影響，而家正值「李顯龍政府」換屆權力交接，內部政治矛盾白熱化，時間上係非常巧合。佢認為，新加坡政府嘅意圖係發出一個信息，提醒任何有意干預新加坡內政嘅國家，要尊重新加坡主權。《I》