「球王」美斯周日（4 日）喺大球場缺陣成為焦點。由於美斯在港期間幾乎全程黑口黑面，而抵達日本後就變得笑盈盈，令外界懷疑美斯缺陣嘅真實原因。而美斯本人就現身日本記招解畫傷勢，話自己照磁力共振後未發現有傷，稱香港情況「不幸」，據報教練有信心畀佢喺日本上陣。對此，文化體育及旅遊局局長楊潤雄回應稱，如果此事成真，佢會唔開心。

美斯訪港期間幾乎冇表情，笑容罕有，尤其係周日比賽嗰日，佢喺後備席同在場球迷零互動，到頒獎禮時仲企到球隊最後一排，一直都不發一言，完全冇笑。有球迷指出話：「我唔覺得佢喉嚨都受傷……好失望。」

美斯係香港齋坐唔踢，唔單止全場近4萬球迷噓佢、倒采，仲大叫「回水」，美斯當場扁嘴，而當國際邁亞密隊其中一位教練碧咸發言時，亦被噓，場內司儀即時用英文喊：「請尊重碧咸。」到周一球隊離港，唔少球迷「追車」，坐係隊巴車尾嘅美斯依然冇表情，對球迷嘅熱情毫不動搖，表情無改，都冇揮手。

不過美斯抵達日本時，就不時露微笑，更笑住向在場球迷揮手。佢喺日本機場出現嘅片段，見佢係保鑣陪同下，提住橙色行李箱出嚟。行到旅遊巴前，佢將行李箱交俾工作人員。現場球迷不斷叫「Messi」，美斯上旅遊巴前，向現場人士揮手。

同香港情況唔同，美斯喺東京抵達後翌日就親自出席記者會回應問題，回答咗5個問題，解釋喺香港無法上場嘅原因：「喺香港嘅情況實在唔好，我喺沙特阿拉伯嘅第一場熱身賽覺得身體唔太好，第二場後經磁力共振檢查冇發現傷勢，但仍然唔舒服。香港入場嘅球迷好多，都知道好多人想睇我上場比賽。我好想打，但係仍感唔適，所以唔得不上場，結果好令人失望，希望將來仲有機會係香港踢波。」

美斯又話好開心再次訪日，之前已經幾次到過日本，每次都受到熱烈歡迎，今次重返令佢好高興。被問到明天能否上場，佢話依家唔知情況，會係今日下午練習後，再視情況決定，但強調唔適情況「同幾日前比已經好好多」。英國網媒《Inter Miami News》報道，球隊教練對於美斯健康狀況有信心，相信佢可以上陣。

有好多網民話，其實美斯咪同好多香港人一樣，去到日本，個人就會突然好開心囉，話唔定肌肉發炎都會快啲好返。

但人喺香港嘅楊潤雄局長就唔係幾開心啦！佢喺今日（6日）嘅電台節目講，指事件唔單止同主辦方Tatler同政府有關，仲同好多入場球迷有關，包括專程嚟港嘅旅客。主辦方撤回M品牌嘅申請，淨係解決政府對佢哋資助嘅問題，當局會繼續要求主辦方向球迷交代。

佢又話自己當日喺球場，有親自同球隊管理人溝通，清楚表達希望見到美斯出場。被問到如果美斯喺日本表演賽落場，佢會唔會不開心，楊潤雄表示當然會，但又話不能排除經過幾日，美斯傷勢好轉。《I》