俗語有云， 「信你一成，雙目失明，信你兩成，下落不明。 信你三成，死多兩成」。正當全世界一致認為中國經濟陷入危機之時，北京當局就畀出完全相反嘅答案。國家統計局今（17日）公布，中國去年全年 GDP 成長 5.2%。央視更大言不慚稱，如果由對世界經濟增長嘅貢獻率黎睇，中國去年貢獻比美洲、歐洲同日本總和更多。另外，經歷半年「完善」後，當局再次公布青年失業率為 14.9%，新嘅統計方式唔包括在校生。

統計局公布，中國去年全年國內生產總值1260582億元，按不變價格計算，增長5.2%。生產總值增加超過5萬億元。分季度睇，第 1 季較去年同期增長 4.5%，第 2 季成長 6.3%，第 3 季增長 4.9%，第 4 季成長 5.2%。

統計局嘅公告大讚，呢一切偉大成就都係「以習近平同志為核心的黨中央堅強領導下」，方能「加大宏觀調控力度，著力擴大內需、優化結構、提振信心、防範化解風險」，令經濟回升向好，就業物價整體穩定，主要預期目標圓滿實現。

《中央電視台》就指，根據世界銀行對2023年各主要經濟體GDP增速嘅預測進行估算，中國經濟增量係美國嘅1.5倍左右，係歐元區嘅16.5倍左右。

央視吹噓，中國GDP突破126萬億元，唔單止係總量越來越大，「更增加不少好東西」，包括量產嘅C919大飛機、第一艘國產大型郵輪，「一機難求」嘅國產「高端」手機。又話去年中國亦出口1萬幾億元嘅「新三樣」(電動車、鋰電池同光伏電池)，亦生產全球約四分之一嘅糧食、三分之一嘅汽車、一半以上嘅鋼鐵、近六成嘅家用電器。

唔單止係咁，統計局係暫停發布16至24歲青年失業率近半年後，最新公布調整口徑後數據，2023年12月，「唔包括在校生」嘅16至24歲勞動力失業率為14.9%，25至29歲、30至59歲失業率為6.1%和3.9%，而整體中國城鎮失業率為5.1%。

統計局強調，在校學生主要任務係學習，而唔係做兼職工作，「如果把在校學生包含在內，會把在校尋找兼職和畢業後尋找工作的青年混在一起，不能準確反映進入社會真正需要工作的青年就業、失業情況」。又話，將在校生剔除有利於更準確反映進入社會嘅青年情況，給予更加精準的就業服務，制定更加有效同針對性嘅就業政策。

去年上半年，中國青年失業率連續多月創下新高，去年6月更曾見21.3%嘅歷史新高。官方於8月以「勞動力調查統計需要進一步健全優化」為由，暫停公布相關數據。《I》