緬甸北部武裝衝突不斷，中國雲南省鎮康縣周三（3日）下午突然遭到來自緬甸嘅砲彈攻擊，官方證實至少造成5人受傷。

一枚砲彈掉落喺雲南臨滄市嘅鎮康縣南傘鎮一條街道。閉路電視畫面顯示，街道嗰邊好多間商舖受咗嚴重嘅損害。鎮康縣人民醫院嘅工作人員透露，有5名因砲彈受傷嘅市民被送返醫院接受治療。

網傳片段顯示，砲彈掉落喺南傘鎮一條街道之後，街邊揚起灰塵，有雜物飛彈出車路，多間商舖都受咗嚴重損害，唔少市民企喺路邊了解情況；有啲人躺喺地上，衣物有血漬，疑似受傷，現場有救護車運送傷者。

目擊者話，砲彈突然掉落喺佢哋店嘅傍邊，當時佢同砲彈嘅距離只有20米，隔壁間商店嘅玻璃都被衝擊波震爛，「旁邊那幾家是（有人）受傷了，有兩個女的受傷了，它門頭都損壞了，炮彈的聲音很明顯」。

南傘鎮鎮政府嘅工作人員話，已經派人到現場處理，鎮嘅領導同縣政府等相關部門都已經到場了解情況，目前正在核實受傷人數。鎮康縣人民醫院嘅工作人員表示，1月3號下午2點左右，有5名因砲彈受傷嘅市民被送到醫院接受治療。臨滄市外事辦相關負責人證實，係境外武裝衝突嘅流彈掉落喺境內，現場損失同炮彈具體來源正在核實。

鎮康縣人民政府網站介紹，鎮康縣位喺西南邊陲，同緬甸果敢自治區接壤，縣城南傘同緬甸果敢楊龍寨一橋相連，係中國西南最極邊嘅一座岸城一體化「邊地新城」；鎮康縣毗鄰「金三角」地區，國境線有96.358公里長，無天然屏障。

中國駐緬甸大使館上個月28號公告，指近日緬甸北部果敢老街地區嘅衝突持續，而喺當地嘅中國公民安全風險升高，呼籲中國公民儘快撤離。部分中國網友得知呢個消息後，對解放軍嘅軍事實力表現出擔憂。有網民話：「行嗎？」、「這還有軍事防禦能力嗎？」、「人家隨便射，咱們的軍隊在哪裡？」、「這是不管了吧！」《I》