上週五（22日）北京當局發布網絡遊戲新規草案，計劃對該行業進行更嚴格嘅監管．即刻引起市場嘅強烈反應，多間遊戲股喺22號急跌，市值蒸發高達800億美元。昨（25日），當局緊急宣布批准105款國產遊戲版號。但係，市場對於官方補鑊嘅行動並唔埋單，昨A股多家遊戲股繼續跌停。

國家新聞出版署發布《網絡遊戲管理辦法（草案徵求意見稿）》，主要內容涵蓋網遊經營、課金和獎勵機制嘅限制，包括禁止設置每日登錄、首次充值等誘導性獎勵，以及所有網絡遊戲必須設定用戶充值限額。該草案特別強調對未成年人嘅保護，要求嚴格控制未成年人使用網遊嘅時段和時間，對容易導致沉迷嘅遊戲禁止未成年人登錄等。

內媒《澎湃新聞》報道， 國家新聞出版署最新批准嘅105款遊戲版號，包括騰訊嘅「逆戰：未來」、網易嘅「螢火突擊」等。今年國產遊戲版號嘅發放全部結束，今年公布嘅國產網路遊戲版號總數達到了977款，而2022年為468款，年增108.76%。

雖然當局明顯急於補鑊，但資本市場反應冷淡。25日，A股遊戲股仍持續大跌，其中巨人網絡、愷英網絡繼22日後再度跌停作收，三七互娛、電魂網絡亦分別重挫7.87%及6.47%。

國家新聞出版署有關官員話，對於各方就草案相關條文提出嘅關切和意見，該署將「認真研究」，並將喺「繼續聽取相關部門、企業、用戶等各方意見的基礎上，進一步修改完善」

中國財經領域自由撰稿人劉遠舉25號喺英國《金融時報》中文網撰文指，新規定做得太過頭，管得太細，過分干預咗企業經營嘅自主權，干預到遊戲嘅設計細節同市場推廣，改變咗行業規則，違反咗產業發展嘅自然規律。

佢認為，呢啲規定反映咗對遊戲市場一啲亂象嘅深入研究，但做法違反咗行政比例原則，在問題導向的思路下，越過了遊戲內容、遊戲時間這些通常的政策對象，而直接指向了面向完全民事行為能力人的行銷方式」，甚至管到咗成年人嘅購買金額，令市場憂慮「監管越界」，可能會有更嚴厲嘅監管，引發咗全行業嘅震動。

佢舉例，好似國家一直鼓勵人少抽煙，並冇引起行業恐慌。但係，如果禁止成年人買更貴嘅煙、設定成年人一個月抽煙嘅總金額，肯定會引起行業恐慌。

劉遠舉認為，中國存在一種「行政慣性」，好多政策都強烈地以解決問題為導向，為咗提高政策效果，採取各種能想到嘅手段。但係，卻忽略咗政策本身是否符合倫理、是否遵循行政比例原則、會產生乜嘢目標之外嘅後果等，亦欠缺同各利益方調查、溝通。《I》