立法會公務員及資助機構員工事務委員會早前開會，會上有議員提出，之前有兩位廣播處處長持有外國國籍，問政府會唔會考慮改變公務員嘅國籍要求。當時回應嘅公務員事務局局長楊何蓓茵指出，根據《基本法》現時對公務員並無國籍限制，改動牽涉《基本法》，所以唔適宜輕易修改。

而前特首、現任全國政協副主席梁振英就喺佢嘅社交專頁上發表咗個人見解，指出政府雖然不斷推廣愛國教育，但年輕人經常用特首家屬同高層公務員持有外國國籍嚟質疑政府嘅說法，佢質疑楊何蓓茵嘅回應能否令年輕人信服。

梁振英進一步指，政府部門首長嘅國籍問題係一個重要嘅政治議題。佢話，特區政府如果真心希望部門首長放棄外國國籍，可以有好多方法做到，比如當一位現任部門首長準備退休，局長可以搵佢嘅副手傾升職事宜，然後順便問下對方有冇外國國籍。佢相信，如果咁問，該副手第二日就會「一家大小齊齊辦手續」主動申請放棄外國國籍。

梁振英認為，如果部門首長能夠主動集體放棄外國國籍，示範做點「犧牲」，將會對愛國主義教育起到更具體嘅示範作用，「愛國主義教育就有姿勢有實際了」。

翻查資料，多名問責官員同行會成員嘅配偶或子女都擁有外國國籍，例如特首李家超嘅太太同兩名兒子、財政司司長陳茂波嘅太太同兩名子女都持有英國國籍。《I》