中國醫保喺疫情期間因爲當局瘋狂嘅核酸檢測政策負擔龐大支出。2023年疫後，面對財政危機嘅地方政府更改醫保制度，令民眾負擔費用增加、保障卻減少，引起民眾、特別係老人家嘅強烈不滿，好多人最後決定退出醫保。2022年已經有1,900萬人退出，鑒於2023年經濟都未有好轉，退出醫保嘅人數估計會更多。

《金融時報》引述中國官員同分析師表示，2023年嘅投保人數可能會大幅下降，而家官方公佈咗8個省份前9個月嘅數據，其中7個省份嘅投保人數都比去年更少。依據國家統計局數據，自2018年以來，居民醫保最低保費升咗一倍有多，而同一期間農民工嘅平均工資漲幅是24%，但居民醫保要保人喺大城市醫院嘅自付費用卻居高不下，高達5成至7成。

依家退休人士每年要自付超過500元人民幣嘅藥費同門診費用，超過嘅部分先至可以俾統籌基金部分報銷，而在職嘅勞工就要超過700元人民幣。醫保本身又有個「封頂線」，即係超過一定額度後就唔會再支付（額度標準每個地方唔同）。

因為居民醫保嘅保障好有限，好多中國家庭而家經濟困難，唔少人認為繳醫保費用「唔抵」，《金融時報》訪問咗一位45歲湖南嘅農民工，佢決定唔再交醫保，話2023年3月做咗個背部手術，醫保淨係給付咗佢手術費2萬元人民幣中唔到40%。佢話：「醫保並沒有減輕我的醫療負擔，為了保持健康，我還不如多花錢買好一點的食品。」另外一個55歲嘅建築工人失業咗幾個月後，決定唔再交380元人民幣嘅年保費，佢話：「我需要充分利用有限的積蓄，醫保不是我的優先選項。」

為咗阻止居民醫保投保人數繼續減少，唔少地方政府開始出奇招。內媒《瀟湘晨報》報道，喺一個500人嘅「曹各莊村信息群」內，一名用戶名為「曹各莊村劉某某」嘅人發言稱：「醫保繳費到25號就截止了，還有沒交的，抓緊時間了。沒在群裡的提醒一下親戚朋友們。將來你的孩子考公務員都得政審，得記入檔案，雖然是自願交醫保…父母都不交醫保，孩子還怎麽考公務員和事業編，不能拖孩子的後腿」。

之後「劉某某」再次發言「以後你孩子考上老師、考上醫生、考上事業編和公務員了，筆試面試分都過了，最後臨門一腳政審沒過，不要後悔終身」。對此，該名劉姓男子受訪時回應，佢係河北保定曹各莊村委會嘅一名工作人員，的確有呢份聊天記錄，但否認係佢本人發送。

而南城司鄉人民政府一名工作人員就回應，內容發布者係曹各莊村一名外聘嘅會計，又話「他也是出於好意，但是他沒有經過培訓，不太懂，我們已經進行批評教育了。」《I》