
金鐘樂星同銅鑼灣 Vootic,兩間做二手名牌寄賣嘅店,懷疑拖欠客人款項,負責人失聯。截至十一月十八日傍晚六點,警方接到二百一十六人報案,銅鑼灣店佔一百四十人,金鐘店佔七十六人,報案涉及合共約三千八百萬港元。警方暫列欺詐,由灣仔同中區重案組跟進。成件事有兩個概念要講清楚。第一,寄賣拖數,幾時可能變成欺詐?第二,點解一個用過嘅手袋,仲有人肯出高價買?
寄賣即係我有個袋,交畀你幫我搵買家。賣到之後,你扣返佣金,再按約定同我結算。呢盤生意最重要嘅地方,就係交貨同收錢有個時間差。我今日交咗個袋,幾時賣出,賣咗幾多,幾時過數,最先知道嘅都係店方。到店方失聯,客人可能連個袋賣咗未都唔知。
咁拖數係咪欺詐呢?要睇當時嘅意圖,同埋有冇用欺騙手段令人交貨。譬如一間舖做咗好多年,一路有正常買賣同結算,後來生意轉差,周轉不靈,最後有貨款畀唔出。如果證據只顯示佢無力履約,咁追討欠款或者要求賠償,通常係民事問題。另一種情況,有人一開始就冇心做真正嘅寄賣生意,靠假買家、假付款承諾,氹人交一大批貨,收完就失聯。呢類情況,如果有證據證明佢有意圖行騙,亦證明有人因為受騙而交貨,令對方得益,或者令交貨人蒙受損失或面對重大損失風險,就可能構成欺詐。
仲有一種情況最值得查。間舖原本可能真係有做生意,但去到後期,某一次收貨,係咪有人明知自己講嘅嘢係假,照樣用嚟氹客人交貨?所以做咗幾多年,只係背景。要睇返每次收貨嗰陣講過乜,當時知啲乜,之後件貨同筆錢去咗邊。警方暫列欺詐,現階段要靠呢啲證據釐清。
第二個概念,就係二手價值,即係 resale value。我哋細個嗰陣,講起用過仲有人接手嘅名牌貨,最經典嘅係一隻金勞、一架平治。嗰時新平治年年加價,有啲熱門款,你揸咗一輪,遇啱市況,轉手甚至可能賣得高過當初入手價。今日好多普通平治,新車落地之後嘅折舊,就同當年我見到嘅情況好唔同。仲有以前嗰啲貴打火機,Dupont、Cartier,有啲款攞去當舖,人哋都肯估價。因為佢識貨,亦知道有冇下一個客肯接。
後來,名牌手袋就成為二手市場一門大生意。今次報案涉及嘅貨品,據報就包括名牌手袋同珠寶。講到手袋轉售,最典型係 Hermès 嘅 Birkin 同 Kelly。兩款設計流行咗好多年,買家認得,二手市場亦有成交紀錄可以參考。熱門款喺專門店難買,想即刻買到指定尺寸、顏色同皮料嘅人,就可能肯畀溢價。呢個就係大家講嘅「飢餓營銷」效果。不過,同樣叫 Birkin,尺寸、皮料、成色唔同,成交價可以差好遠。供應同需求一變,溢價亦會縮。
所以一個袋有幾保值,同你交個袋畀人之後有幾大把握收到錢,係兩筆數。你比較兩間店,一間報價高啲,但賣出後要等幾耐先收錢?未賣出,幾時可以攞返?賣咗,又有冇紀錄畀你核對?呢幾個問題,同個報價一樣重要。
返到今次單案,二百一十六人報案,最想知道嘅都係同一件事。未賣嘅貨,依家喺邊?已經賣咗嘅,幾時成交,邊個收咗錢,筆款去咗邊?要交代,就由逐件查貨、逐筆對數開始。