有德國媒體追蹤中資收購德國企業十年後，嘅現況。德國公共廣播聯盟ARD，透過50間由中國投資者控股嘅德國企業，發現這些公司喺營收同就業方面大致穩定，未見系統性「掏空」德國工業嘅證據；但汽車零部件企業基克特 (Kiekert) 破產個案亦顯示，今日嘅風險已經不只係邉個買左企業，而係制裁、銀行融資同地緣政治會否突然壓到工廠門口。

2016年係中資收購德企嘅高峰。當年中國投資者喺德國作出68宗部分或全面收購，焦點集中喺機械工程、汽車同電氣工程等德國傳統強項。當時批評者擔心德國技術被賣走，支持者則認為中國資本可以帶來新市場、新資金同增長空間。10年後再看，這場爭論未能用「福」或「禍」兩個字收結。ARD分析顯示，被研究企業喺收購5年後，平均營收較收購當年高出6%；員工人數喺新冠疫情期間下跌後，亦恢復至收購時水平，部分更略有增加。

這並不代表中國投資者必然令德企更成功。企業10年間受市場周期、成本、管理、供應鏈同技術轉型影響，單靠股東國籍不能解釋全部結果。但同樣重要嘅係，數據亦未支持「中資一入場，德國企業就被系統性拋售」呢個講法。德國工業界過去多年最擔心嘅技術外流，實際情況比想像中複雜。約70%受訪企業表示，向中國轉移嘅技術專長有所增加；但超過一半企業同時表示，佢地亦從中國取得知識同經驗。換言之，知識流動不是單向抽血，而係一種帶有權力不對稱、但仍有互惠成分嘅產業交換。

問題在於，商業互惠不能抵消政治風險。基克特個案成為警號。這間位於北威州海利根豪斯 (Heiligenhaus)、有169年歷史嘅門鎖系統製造商，2012年被中國企業收購，生產繼續留喺德國。但公司於2025年陷入財困後，據報中國股東未有提供原先承諾嘅大額資金；基克特於2025年9月23日申請破產。ARD報道指，德國銀行同北威州銀行拒絕貸款及擔保申請，背景包括美國對中國母公司嘅制裁。

這帶出一個新現實：跨國收購不再只是資本配置，而係安全審查、制裁合規同金融風險嘅交匯點。對工人而言，問題不是宏觀口號，而係工資、訂單同職位會否因一場遠在華盛頓、北京或布魯塞爾嘅政治衝突而受牽連。對企業而言，外資可以帶來市場，但一旦母公司被制裁，融資渠道亦可能即時收窄。對德國政府而言，真正考驗不是簡單拒絕外資，而係如何分辨普通商業投資、戰略技術風險同制裁連帶風險。

同一時間，中國仍然係德國重要投資來源。德國聯邦外貿與投資署 (GTAI) 2025年外資報告顯示，德國當年錄得1,564個外資項目，按年下跌9.3%；但中國以228個項目超越美國嘅206個，成為德國最大外資項目來源國。需要留意的是，這項統計包括綠地投資、擴張同遷址項目，並不包括併購。

所以，中資收購德企10年回顧，最準確嘅結論不是「福」或「禍」，而係「有利亦有價」。它未必帶來德國工業被整體掏空，亦未必自動換來企業增長。真正變咗嘅係風險嘅形態：以前嘅人問，中國投資者會唔會買走德國技術；今日更要問，一間德國公司若被捲入大國制裁鏈，佢仲可唔可以喺銀行、供應鏈同政治壓力之間穩住生產。下一步歐洲要面對嘅，不只是外資准入問題，而係如何喺開放市場同經濟安全之間，建立一套不靠情緒、但足夠清醒嘅防線。