盧比奧警示全球:唔好同特朗普總統玩嘢
盧比奧警示全球:唔好同特朗普總統玩嘢

美軍日前喺委內瑞拉首都加拉加斯採取代號「絕對決心行動」(Operation Absolute Resolve)嘅突襲,成功逮捕被美方指控為「毒梟」嘅馬杜羅(Nicolás Maduro)及其妻子。美國國務卿盧比奧(Marco Rubio)喺美國時間周日巡迴出席各大電視台政論節目,首度詳盡解釋呢次行動嘅理據。佢強調,今次行動證明咗特朗普總統係一個「言出必行」嘅領袖,同以往只係識得「口頭譴責」嘅政客截然不同。

 

盧比奧喺接受 ABC 電視台《本週》(This Week)訪問時,多次讚揚特朗普嘅果斷。佢直言:「過去咁多年,華盛頓充滿咗只係識得畫紅線、發聲明嘅政客,但馬杜羅根本唔當回事。但特朗普總統唔同,佢講過要剷除威脅美國安全嘅毒梟政權,佢就真係會派兵去捉人。」

 

盧比奧形容,今次突襲係對全球獨裁者嘅一個警示:「我哋嘅總統唔鍾意玩外交辭令,佢鍾意解決問題。當佢話所有選項都喺枱面上(All options are on the table)嗰陣,佢係認真嘅。」

 

除咗政治立場,盧比奧仲喺訪問中計咗一條「經濟數」。佢透露,由於美軍特種部隊今次行動極速且精準,喺零傷亡嘅情況下直接喺加拉加斯帶走馬杜羅,實際上為美國納稅人慳咗一大筆錢。佢家下望向隔離嘅特朗普話:「我諗我哋啱啱慳返5000萬美金。」

 

喺談到地緣政治時,盧比奧特別提到古巴。佢指出,馬杜羅嘅保安部隊入面「塞滿晒古巴人」,形容委內瑞拉已經變成古巴嘅「殖民地」。佢向哈瓦那政權發出嚴厲警告,話如果佢係古巴領導層,而家見到馬杜羅嘅下場,一定會「覺得好不安」,因為美國唔會再容忍境外勢力喺西半球搞事。

 

對於總統特朗普宣稱美國會「接管」委內瑞拉,盧比奧解釋呢係指喺過渡政府建立之前,由美方主導資源分配。佢形容現時委內瑞拉嘅石油產能被「海盜式營運」,美方嘅介入係要幫當地人確保石油收益唔會再流入毒梟嘅口袋。

發佈時間: 2026年01月05日 15:26
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.