根據台灣《中央社》17號報導，近日中共中央力推家電消費品「以舊換新」新政策，中國「家電協會」執行理事長 姜風15號在黨媒發文指：家電未壞就可一直用係「認知誤區」，家電產品「同食品一樣」都有「保質期」，咁離地嘅言論被民眾批評「離曬譜」，有人指：國家要人民更新，都要等大家有錢先講啦！

報導指出，姜風15號在中共中央黨報「學習時報」發表嘅文章，全題為「以舊換新需要走出認知誤區」，而佢選擇在「學習時報」表忠心，為黨中央及總書記習近平最新嘅「以舊換新促銷費」之作為「撰文支持」，擦鞋之意不在話下，亦意外令爭議文章受各界注意。

姜風在文中稱，多數消費者對家電產品「壽命」存在一定嘅「認知誤區」，總認為「只要未壞就可以一直用」、「只要可以修就唔想丟」，甚至覺得將仲可以用嘅家電汰換，係一種浪費行為。實際上，家電產品就如同食品一樣，有保質期保鮮期。

姜風引用數據指，根據中國家電協會訂定之「家電安全使用年限」，冰箱、冷暖氣之安全使用年限為10年，洗衣機、熱水器、吸油煙機為8年。以此估算，2022年冰箱、冷櫃、空調、洗衣機等產品，在中國可更新之總量為1.5億部，理論上占2022年「內銷量」比率80%。

但實際上，中國冷暖氣真實更新率可能不超過50%，冰箱、洗衣機亦僅只有60%更換率，就意味著「有大量家電產品」正在「超期服役」中，甚至存在大量「使用超過10年甚至20年嘅家電產品」，仍然被使用中。

姜風稱，「超期服役」嘅家電產品，一方面存在各類部件或材料線路年久老化，有引發人身傷害或財損之安全隱憂，超期使用時間越長，發生事故嘅概率越高。另外，其功能及性能已經全面落後於當前新產品，水、電、瓦斯消耗量會隨性能衰減而增加，反增加用戶水、電、瓦斯費用支出。

不過中國民眾並不傻！有人質疑並批評指：有個賣電器嘅出來講「保質期」，意圖太明顯！有人諷刺形容：消耗地球，不擇手段。有人反諷：國家俾我免費「以舊換新」，我同你日日換！有人就直言：要更新都要有錢先講！而家重點就係大家都冇錢，攞咩出來更新？

有網友用智慧拆穿謊言稱：而家搞「以舊換新」好明顯就係「搶救內需」！而內需不振，原因就係因為大家手上冇錢！咁既然人民冇錢提振內需，邊度去生錢出來將家電、汽車全部「以舊換新」？

在事件發酵同時，部分專家都搖頭嘆氣。南京市「房地產學會」副會長 孟祥遠就係其中之一，過去佢多次對中國樓市發表意見，但見到咁「離地離譜」嘅發言，佢都表示：而家為咗刺激市民買家電，已經可以做到咁樣？又意有所指話：嗰位姜理事長自己有冇保質期，或者都換一換？