墨西哥政府受美國施壓，已決定同中國汽車製造商保持距離，唔俾佢哋喺墨西哥投資設廠嘅優惠，包括廉價用地同減免稅款。

路透社周四引述三位知情墨西哥官員報道，墨西哥官員喺今年一月同比亞迪公司嘅會談中清楚表示，佢哋唔會再向投資建廠嘅車企提供獎勵同優惠，而且暫停未來同中國車企嘅談判。

美國貿易代表戴琪星期二喺國會聽證會上話，拜登政府正「認真考慮」各種貿易防禦措施，包括檢討特朗普政府對中國進口商品徵收嘅關稅。

早前，美國財政部長耶倫訪華期間已經警告中國領導人，佢哋過度投資導致嘅產能過剩，有可能傷害到美國同其他地方嘅製造商。

拜登總統星期三宣布多項針對中國嘅貿易措施，包括提高中國鋼鐵同鋁產品嘅進口關稅，同時施壓墨西哥禁止中國轉口避稅，同時對中國喺造船、海事同物流領域嘅貿易做法啟動調查。

拜登亦表示，美國已派遣代表團前往墨西哥，同墨西哥總統討論呢個議題。白宮經濟顧問接受媒體採訪時亦表示，美國會同墨西哥合作，防止中國透過墨西哥避稅出口鋼鐵同鋁製品。

而家大約有20間中國汽車品牌喺墨西哥市場銷售，但冇一間中國車企喺墨西哥設廠。中國汽車喺墨西哥市場嘅佔比大概有三分之一。

消息人士話，墨西哥政府同中國車企保持距離主要係受美國政府壓力影響，特別係美方要求將中國車企排除在北美自由貿易協定規定嘅貿易區域之外。

美國貿易代表辦公室雖然冇正面回應施壓一事，但表示美墨加協定（USMCA）並唔意味著俾中國或其他國家可以唔繳稅入侵美國市場嘅後門。呢位官員話，美方專注喺汽車、鋼鐵同鋁製品呢啲問題。

路透社指出，美國對墨西哥嘅施壓，反映美國汽車業、工會以及美國政壇越來越大嘅擔憂，就係比亞迪、上汽、吉利、奇瑞同江淮等中國車企試圖利用墨西哥作為後門，向美國傾銷廉價電動車而避開27.5%嘅高關稅。戴琪表示，美國必須採取決定性措施，保護美國電動車免受中國補貼電動車嘅競爭。

消息人士指出，雖然中國車企對墨西哥投資可以幫助當地經濟同就業，但墨西哥擔心得罪美國，有可能令華盛頓喺2026年美墨加協議期滿時，提出一啲對墨西哥不利嘅修訂條款。《I》