李龍基未婚妻王青霞（Chris）因被控逾期居留、使用虛假文書等六項罪名還押，今朝（16日）於沙田裁判法院提訊，控方喺庭上又加控一項罪名，指王青霞違反逗留條件接受工作，案件押後到5月28日早上9時30分喺沙田裁判法院續審，王青霞繼續被還押。李龍基離開法庭同傳媒提及未婚妻時兩度痛哭。

據《星島》報道，李龍基大約9點嚟到法院，最初停下來影相兼笑笑口回應傳媒問題，等開庭嘅時候，佢不時閉目休息，王青霞行出庭嗰刻，佢就緊張地望住佢嘅未婚妻，激動得手掩住嘴，想喊出嚟。王青霞穿咗卡其色套裝同粉紅上衣，頭髮綁咗起嚟，戴住口罩，眉頭深鎖，神情憔悴，眼淚濕潤，同李龍基對望咗一陣。

控方喺庭上追加一項控罪，指王青霞違反逗留條件接受工作。李龍基同律師商量過後離開法庭，喺搭升降機嘅時候講起未婚妻王青霞，佢就情緒激動起嚟，不禁流咗眼淚，走出法院後又再接受訪問。

被問到對王青霞新增控罪有冇擔心？李龍基話畀律師去處理，佢自己無能力做啲咩。問佢揀穿鮮艷衫係唔係想王青霞庭上見到佢？佢答話：「係，佢每日都會見到我，呢兩個月除咗去廣州工作，每日都會見到佢，令佢安心啲，佢需要支持，我就係佢最大嘅支持。」

被問到係唔係擔心Chris喺監獄嘅情況？李龍基話每日去探佢，支持佢。李龍基話：「叫佢唔洗擔心，我一定會支持佢，永遠係佢最大嘅支持。」李龍基又講王青霞每日會寫信畀佢，傾吓日常嘅事，但冇講監獄內嘅生活情況。

李龍基提到王青霞喺監獄睇到輿論嘅時候，再忍唔住激動痛哭，佢話：「佢睇到外面講我唔要佢，我要佢知道，我對佢發誓，我同佢講唔好睇啲講大話嘅嘢，我絕對唔會改！」

李龍基話今早7點已經到咗沙田，因為知道沙田好塞車，如果遲到王青霞見唔到佢會辜負佢。佢又提到王青霞父母冇來香港：「佢唔想父母喺呢個環境見到佢，希望去返自由世界再見佢會好啲，我都同佢父母講唔洗擔心，有我喺呢度睇住佢得啦。」

李龍基亦指好多朋友都好關心佢哋，想一齊嚟聽審，連加拿大朋友都打電話關心，無論結果點樣，佢同王青霞衷心感謝大家。《I》