根據《Yahoo娛樂》6號報導，第82屆金球獎在美國時間周日晚舉行，今年提名名單公布後，街頭反應冷淡，但賽果卻有唔少驚喜。改編自同名小說嘅《幕府將軍》，成「劇集組」最大贏家，除咗獲得最佳劇集，男主角 真田廣之奪「劇集類」最佳男主角，成為首名亞裔視帝。

同劇嘅 淺野忠信、澤井杏奈，亦分別獲得最佳男女配角獎，可話係繼 楊紫瓊《奇異女俠玩救宇宙》後，亞裔演員再次揚威頒獎台。而舊年成熱話嘅《馴鹿寶貝》(Baby Reindeer)今次奪得「短篇劇」最佳劇集，演跟蹤狂女律師嘅 Jessica Gunning亦獲「短篇劇」最佳女配角。

電影方面，90年代憑《人鬼情未了》走紅嘅 狄美摩亞Demi Moore，終憑《完美物質》獲得電影「喜劇類」最佳女主角，一嘗影后滋味。狄美摩亞嘅對手唔弱，有《阿諾拉》嘅Mikey Madison、《毒王女人夢》嘅Karla Sofía Gascón等，阿姐終於威返次。

而《毒王女人夢》就成為電影組別小贏家，因為今年獎項分配好平均，《毒》都只係拎到4個獎，包括喜劇音樂劇最佳電影。而相信會係另一套喺奧斯卡爭獎大熱嘅《粗獷派建築師》得到最佳劇情片、劇情片最佳男主角（Adrian Brody）等3個獎。