根據台灣《中央社》28號報導，中國鋼鐵工業協會表示，今年前3季重點鋼企統計利潤總額年降56.39%，經濟效益顯著下滑係全行業應共同面對嘅問題，應防止「內捲式」惡性競爭。另指，今年前3季中國累計出口鋼材年增21.2%，針對中國鋼嘅國際貿易壁壘正加速構建中。

中國鋼鐵工業協會官網發佈消息指，2024年第3季訊息發布會25號在北京召開，鋼協黨委副書記、副會長兼秘書長 姜維 表示，經濟效益明顯下滑係全行業目前面臨嘅直接問題，問題在需求面，亦係「內捲式」惡性競爭嘅惡果。「內捲式」惡性競爭不止，行業整體健康、可持續發展將無從談起。

姜維表示，企業要認清當前形勢，同以往下行週期相比嘅特殊性及嚴峻性，理性面對鋼鐵發展階段嘅調整，以實際行動落實中共中央此前提出防「內捲式」惡性競爭要求，認真踐行「三定三不要」，即係「冇訂單不產、低過成本不售、不付款不發貨」嘅經營原則，共同自律，維護市場穩定、提高經濟效益、降低經營風險。

姜維披露鋼鐵業嘅生產經營狀況。佢表示，據中國國家統計局嘅數據，今年前3季，全國累計生產粗鋼7.68億噸，年降3.6%，「表面消費量」即產量加淨進口量達6.88億噸，年降6.2%。

今年前3季，中國累計出口鋼8071萬噸，年增21.2%，出口均價每噸770美元，年降21.6%，比同期國內鋼材均價高39.5%。今年前3季，重點統計鋼企利潤總額達人民幣289.77億元，年降56.39%。

姜維表示，針對中國鋼產嘅國際貿易保護主義抬頭，跡象轉趨明顯，多形式壁壘加速構建，鋼材出口面臨挑戰。當前嘅鋼鐵市場供需動態未平衡，市場稍有好轉業界就博命生產，因此而加劇供需矛盾，最終打壓價格，業界再次陷入「越產越虧、越虧越產」嘅困境。

姜維呼籲業界加強自律，防止「內捲式」惡性競爭，加快研究推進產能治理及聯合重組。中國樓市疲軟致國內鋼鐵需求大減，大量鋼鐵被轉向出口，引發中國同部分國家發生貿易磨擦，土耳其、印尼、北美、南美等多國，已對中國鋼產徵收反傾銷稅，防廉價中國鋼湧入，損害當地製造業利益。