根據台灣《中央社》21號報導，西藏官方在日前宣布，凡符合在西藏首次投資人民幣300萬以上等條件嘅企業「法定代表人」及「原始股東」，其子女可以選擇在西藏參加高考。由於西藏嘅錄取門檻在中國係最低嘅，引起唔少民眾質疑有開後門等考試不公之嫌。

西藏自治區教育廳、投資促進局在18號聯合發布通知，主題為「關於進一步規範全區招商引資企業投資經營者子女，參加我區普通高考報名的通知」，上述通知由「西藏教育考試院」官方微信帳號，透過微信公眾號轉發，當中不公內容被外界討論。

「通知」指出，凡在西藏註冊且連續經營3年以上，並連續3年以上在西藏納稅，同時連續5年以上聘用設籍在西藏嘅人員就業，且每年保持在5人以上，同時在西藏首次實繳投資金額超過人民幣300萬元，在5年內冇撤資撤股嘅企業，係合規嘅先決條件。

「通知」規定，符合上述規定嘅企業，其企業代表人及原始股東嘅子女，若擁有西藏戶籍3年以上、西藏高中階段學籍1年以上，並且在西藏實際就讀，就可以在西藏報名參加高考。其中一年條款被指係針對「高三生」嘅優惠條款。

不過，為防止有人將子女由其他高考競爭較激烈嘅省，偷渡到西藏去報考，「通知」亦宣示，將嚴厲打擊違法違規行為，而且見一個查一個。另外，對開立「虛假證明」等方式取得西藏高考報名資格嘅考生，或企業經營者「出現提前撤資撤股或裁員者」，可取消入學資格或畢業資格，並將涉嫌犯罪行為者移送司法機關。

儘管有上述條件及違規處罰條款，仍然有唔少中國網友對西藏官方以「子女參加高考為餌」來招商引資嘅做法表示質疑。其中最普遍嘅意見就係，地方政府為「有錢有勢」嘅家長子女提供上「優質」大學嘅捷徑，對其他絕大多數冇條件，甚至寒窗苦讀要考大學嘅家長子女，是極不公平嘅作法。

有中國網友指出，西藏嘅高考錄取分數線，係全中國最低嘅標準，主要係因為西藏嘅教育資源最缺乏，都算係「照顧吓」當地嘅學生所安排嘅舉措。如果外地富商單憑財力，就可以將子女轉去西藏考大學，最終將會嚴重排擠當地「艱苦、貧困、冇權勢」嘅學生權益。

報導指出，根據2023年中國高考數據顯示，北京大學、清華大學等名校嘅「一本大學」分數線，西藏考區只要400分就可以入讀，居全國31個省區之末。但周圍「四川、貴州、廣西」等省區，至少要攞到520分以上，先能進入一級學府。因此，在西藏參加高考嘅考生，就有機會憑較低嘅分數，考上中國頂尖大學。