早前，《小紅書》上流傳有人利用假學歷成功入讀港大經管學學院，港大已經報警處理。院長蔡洪濱喺接受中國《財新網》訪問時表示，經調查發現至今有大約30幾名中國籍學生以虛假海外學歷報讀，甚至有中介利用假嘅紐約大學證書同信封申請入學。他估計，最終可能涉及80至100名學生嘅學歷造假。

蔡洪濱透露，校方喺今年5月開始全面徹查，要求所有喺讀嘅碩士生重新提交本科學歷認證同成績單材料。早前被揭發以假學歷入學嘅碩士生，疑似涉及「保錄取」服務嘅中介機構，學院已掌握相關合約，一份「保取錄」合約收費50萬人民幣。蔡洪濱強調，中介來自中國及海外嘅不同地區，目前尚未發現有香港嘅中介機構，他坦言：「佢哋以假亂真嘅手法已經去到驚人嘅地步，喺呢次學歷覆查中，港大校方抽查咗六成、1500幾份材料，都未能發現造假嘅痕跡。」

蔡洪濱提到，中介寄送嘅文件連封條都同真嘅一樣，但並非所有學生都知道中介會偽造學歷。他指出，有啲學生以為中介只係幫助包裝學術經歷同撰寫申請文書，但亦有部分學生同家長知情，甚至主動參與造假。

例如，有一位畢業於一間「還不錯」美國大學嘅中國學生，認為自己嘅背景未必能入港大，於是搵中介公司幫忙，以為中介只係替佢包裝學術經歷及撰寫申請文件，結果中介偽造咗一份紐約大學嘅優秀學生成績單及畢業證書，更向港大寄回一套假嘅紐約大學文件。蔡洪濱坦言：「成績單、學位證、信封、封條都同真嘅一樣」，該名學生完全唔知情。但亦有學生及家長本身知情，甚至主動參與造假。

未來，經管學院將加強覆核學生學歷，獲錄取嘅學生除提交證書、成績單外，仲需要從「學信網」、「留服」或其他第三方平台提供學歷認證，並要求部分學生面試。同時，學院將撰寫報告公開「黑中介」造假手法，供香港其他院校參考，並從法律上追究責任，重點打擊黑中介。

令人擔憂嘅係，呢並非單一事件。《財新網》指出，除了港大之外，香港中文大學、理工大學、香港都會大學等多間學校都曾發現類似個案。蔡洪濱表示：「一個人使用假學歷可以申請港大，都一樣可以去申請海外名校。」