內地品牌瑞幸咖啡（luckin coffee），舊年聯乘茅台推出「醬香拿鐵」咖啡，曾造成熱話。不過，網傳有瑞幸員工爆料，而家有門市要一日要倒50多盒製造「醬香拿鐵」嘅原料白酒厚奶。有內媒接觸到瑞幸門店職員，對方確認「醬香拿鐵」銷情好差，幾日先賣到一兩杯。

瑞幸喺舊年9月推出咖啡溝茅台酒嘅「醬香拿鐵」，創下單日售出542萬杯紀錄，之後一段時間，出現「醬香」效應，成為市場推廣嘅流量密碼。然而事隔約半年，「醬香拿鐵」嘅熱潮就出現減退。網傳有自稱係瑞幸門店嘅員工，佢表示而家一日要倒50幾盒過期嘅白酒厚奶。

據內媒東方財經報道，佢哋訪問瑞幸咖啡某間門市嘅工作人員，對方表示「醬香拿鐵的銷量而家很一般，好幾天有可能才會來一兩杯，銷量完全不好，其他地方也是這樣的。我覺得大家可能過了那個新鮮感了，很多顧客反映也不是特別好喝。」

該員工又指，白酒厚奶嘅消耗亦都好浪費。「比如說今天到期，我們就今天晚上全部倒掉，是很浪費。我一打開之後就做了一杯兩杯，剩下的全部倒掉了。」

除咗新鮮感已過，唔再補貼可能亦都係另一個原因。舊年瑞幸咖啡以一杯咖啡9塊9人民幣，快速奪下連鎖咖啡龍頭寶座，市佔超越星巴克。但係，因為住門市激增，補貼金額令瑞幸咖啡難以負荷，喺過年之後，就有人發現瑞幸嘅「每周9.9元，飲一杯」嘅活動縮水。

從舊年五月份開始，為咗同競爭對手庫迪較勁，瑞幸推一杯咖啡9塊9的活動，同時擴張門市數量。但喺2023年第四季嘅財報顯示，瑞幸嘅獲利率就由舊年同期嘅百分之8.5，直接腰斬到3%，而其中嘅關鍵就喺對於加盟店嘅補貼喺舊年第四季，瑞幸用於營銷同補貼嘅費用，就接近4億人民幣，令瑞幸創下舊年單季營利水準最差嘅成績。

由於利潤下滑，令到瑞幸唔再打價格戰。但同時消費者已經養壞咗胃口，接受唔到到貴過9.9元嘅咖啡，瑞幸畀減價呢把雙面刃打返自己，可謂作繭自縛。反觀對手迪咖啡，就宣布維期3個月嘅「全場9.9不限量」促銷，打算再打價格戰，而且早前仲喺廣告上推出「醬香傷肝，米乳養胃」口號，擺明暗串瑞幸。

對於倒50瓶白酒厚奶，內地網民表示「賣那麼貴一定不買啊，瑞幸超過9.9反正我不買」「這麼噁心的東西，怎麼喝的咋去」「味道口感都像是酒後嘔吐物的味道，喝完想吐」「賣這麼貴，銷量差很正常，你試試降價看有沒有人買」「隔壁庫迪美團券都降到7.5一杯了，瑞幸9.9還在縮水」