無綫選秀節目《亞洲超星團》9名勝出練習生組成男團正式出道，曾志偉仲同佢地改團名做LOONG 9。LOONG 9團名喺社交平台洗版，網民議論紛紛。雖然召集人曾志偉表示LOONG 9源自今年龍年，9人用龍象徵，寓意一飛冲天，但廣東話諧音LOONG發音似「燶」，再加上團名讀英文nine，結果網民都笑係「燶奶」、「燶九」。

曾經為男團E-Kids成員嘅阮民安Tommy，就喺Facebook發千字文，表示對LOONG 9呢個隊名不敢苟同，又話覺得「唔意外」仲話「呢班𡃁仔就慘啲喇，個名肯定俾人笑一世」。佢回憶當年E-Kids係由曾志偉同譚詠麟旗下嘅東方魅力StarEast出道，阮民安爆E-Kids出道前原本有另一個團名，都係由曾志偉改，話個名叫A4，所以難怪Tommy話唔意外。

阮民安話當時佢聽到個名，忍唔住爆咗句「A4？紙嚟㗎？」，令曾志偉一度黑面散會。後來阮民安表示喺堅持之下先至有E-Kids呢個「比較易接受啲嘅名出道」。有網民留言拆解因為當年台灣組合F4爆紅，曾志偉貪方便照抄所以改做A4，個邏輯同近排內地興「正名」講year of the Loong，所以貪就手改名做LOONG 9。

另外，AV女優繪麗奈（素海霖）亦都發文抽水，佢尋日喺Instagram發文表示：「話説，我一出道嗰陣，唔少人叫我隆奶，估唔到而家有人拎咗來做組合名。」網民大讚佢嘅抽水文，留言指佢「靚抽」「你咁樣寸153，唔怪之得唔去TVB做訪問啦」「黃河嘅水都俾你抽乾」「有無諗過開棟篤笑」。

另外，LOONG 9的隊徽同樣惹爭議，有人發覺Logo跟內地選秀節目《偶像練習生》男團NINE PERCENT（百分九）的Logo有九成似，如仿王冠造型設計。另方面，LOONG 9的名單已塵埃落定，但第7名入圍嘅文佐匡（香港代表）畀網民圍攻，指佢表現欠佳，落選嘅郭殿甲、張鎬濓、趙天翼及金東彬都實力過佢，有網民要求他讓位。

有網民爆料指，文佐匡本來之前排名喺10名外，但有人課金50萬買星耀值投票，所以佢嘅名次突然提高上到第7名咁話。