內地有私募基金「寧波靈均」近日因使用自動程式大量「沽貨」，被暫停交易3日，兼公開譴責。「寧波靈均」表示深刻反省並致歉，仲話會長期看好同堅持做多中國股市。

深交所同上交所宣布，基於寧波靈均投資管理喺內地龍年首個交易日（2月19日），以自動程式喺1分鐘內合共沽貨約25.67億元人民幣股票，影響到正常交易秩序，所以對寧波靈均實施暫停交易措施，同埋對佢哋作出公開譴責。

據內媒澎湃新聞報導，上海證券交易所同深圳證券交易所20日發布公告指，寧波靈均投資管理合夥企業19日賣出深市股票13.72億元和滬市股票11.95億元，合計賣出25.67億元，影響了正常交易秩序，構成異常交易行為。

針對靈均投資相關行為，深交所決定由2月20日嚟到2月22日止，對寧波靈均名下相關證券賬戶採取限制交易措施，限制喺期間買賣深交所上市嘅所有股票，同時啟動對寧波靈均公開譴責紀律處分嘅程序。上交所都做出同樣嘅決定，由2月20日嚟到2月22日止，對寧波靈均管理嘅相關產品，連續實施暫停投資者賬戶交易嘅監管措施，以及對寧波靈均作出譴責。

深交所仲指出，今年以嚟，寧波靈均名下證券賬戶已經多次因為異常交易行為而收到書面警告等監管措施，但佢哋仲未改正，繼續發生異常交易行為。針對相關事件，深交所表示，將會按照中國證監會嘅統一部署，堅決落實監管要「長牙帶刺」、有棱有角嘅要求，堅守監管主責主業，同時持續加強交易監管，對影響市場正常交易秩序、損害投資者合法權益嘅違法違規行為，始終保持嚴厲嘅基調同埋「零容忍」嘅高壓態勢，快速反應、重拳出擊。

寧波靈均今日喺官方公眾號發布公告稱，公司堅決服從，又話進行咗 深刻反省同檢討，對造成嘅負面影響表達誠懇致歉，並強調公司「長期看好並堅持做多中國股市」。

寧波靈均又表示，將深刻吸取教訓，嚴格把控交易進度、交易約束、控制交易節奏，確保喺交易全過程做到平滑交易、均衡交易，切實維護正常市場交易秩序，全力保障投資者合法權益。

據內媒報道，寧波靈均資成立喺2014年，而家外部客戶資產管理規模，據報超過600億元，同九坤、幻方、明汯一齊被稱為內地程式交易私募界嘅「四大天王」。