足球巨星「C朗」基斯坦奴朗拿度（Cristiano Ronaldo）率領嘅沙特球會艾納斯（Al Nassr FC），原本計劃24號喺深圳進行嘅友誼賽突然宣佈延期，引發球迷憤怒，有部分球迷甚至衝擊球隊下榻嘅酒店。

主辦方宣佈，因為C朗嘅身體狀況出現問題，原訂嘅周三（24日）晚同周日嘅比賽不得不延期。主辦方表示會盡快安排退票，向廣大球迷致歉，會按實際產生嘅機票酒店費用賠償。

喺記者會上，C朗向中國球迷表示歉意「我要向中國球迷道歉，我愛中國，我想為你們踢球。我踢了23年，有些事情和傷病是無法避免的，對此我很難過。」「我2003年、2004年就開始來中國了，中國就像我的第二個家、第二故鄉。我知道你們很失望，但我們也要看到好的一面——我們沒有取消比賽，我們會回來的，中國球迷一直在我心裡。」

不過C朗喺記者會上道歉期間，被指不停玩手機，有球迷質疑佢態度無誠意，不過網民認為係翻譯器，睇手機只係睇稿。

對於突然取消嘅比賽，不過好多專程趕嚟睇波嘅球迷都唔收貨，佢哋表示強烈不滿。有部分球迷衝入艾納斯所下榻嘅酒店，喺酒店門口維權嗌口號，要求主辦方給個說法。有報導指，啲球迷甚至要求同C朗見面，表達佢哋嘅不滿。有酒店工作人員無辜淪為C朗球迷指罵目標，大批公安及後趕至維持秩序。

據悉，C朗同球隊喺1月21日下晝抵達深圳，呢次係佢個人第八次訪問中國，亦係艾納斯隊史上首次嘅中國行。原計劃嘅兩場比賽分別係1月24日對陣上海申花，1月28日對陣浙江隊。

有報導指出，舊年已經有沙特媒體披露，C朗未去中國之前已經受傷，要休息兩到三個星期，但官方未有即時公佈消息，C朗抵達後，主辦方仍聲稱佢會踢足兩場賽事。

內媒上海《新民週刊》報道，C朗帶傷赴華，原因係同比賽合同有關。報道指合同中明列明C朗必須出場一定時間，所以主辦方一直堅稱C朗會上場。毫無疑問C朗係比賽嘅唯一賣點，兩場友誼賽門票在開票後迅速售罄，價格最高4580元人民幣，一切都係因為C朗出場比賽。不過C朗無法出場要延後比賽，艾納斯可能會面臨違約賠償，還可能唔止無出場費，更甚嘅係要倒賠一大筆錢。