美國智庫加圖研究所（Cato Institute）同加拿大智庫菲莎研究所（Fraser Institute）周二（19日）一齊發佈咗2023年度人類自由指數（Human Freedom Index, HFI）嘅排名，評分根據2021年嘅數據，即係反映嗰年嘅情況。瑞士喺165個國家同地區中保持第一，亞洲方面台灣以第12位排最高，中國則排第149位；香港就進一步跌到第46位，法治、言論自由同埋集會同結社自由都大幅下降。

2021年香港發生咗啲乜嘢事？《蘋果日報》被抄家，公司跟住就結束咗。嗰時港警國安處嘅警司李桂華話：「喺我哋國安處調查裡面，由2019年到而家我哋發現，喺蘋果日報裡面有好多篇都係呼籲外國制裁香港同中華人民共和國嘅。」

之後《立場新聞》兩位總編都被捕，公司停運。嗰年，維園燭光唔再，支聯會喺《國安法》嘅影響下宣告解散，副主席鄒幸彤被捕；另一名前副主席蔡耀昌話：「支聯會嘅常委會已經停止工作，即係支聯會未來唔會再有組織名義嘅任何立場、活動進行。」

之後民陣、職工盟同埋教協等喺香港立足多年嘅團體，都自行解散。連參加初選都被視為違法，47人喺嗰年年頭被捕，案件到而家都仲未審結。 

13年前排名第3嘅香港，近年不斷下跌，最新嘅整體排名喺全球165個國家地區中，已由去年嘅第34位跌到46位。當中經濟自由雖然得8.55分，僅次於新加坡繼續排第2，但喺人身自由方面得7.10分，由62位跌到82位；言論自由更加下跌到110位。至於集會同結社自由，更加排喺接近底部嘅第146位，治安得分則微升。

報告形容，香港失去自由嘅悲劇係一個「戲劇性」嘅例子，當中以對《壹傳媒》創辦人黎智英嘅虛假審判為象徵，作為打壓香港傳統自由嘅一部分，北京因為黎智英倡導言論自由同其他基本權利而將佢監禁。報告都指出，鑑於香港個人同公民自由嘅大幅惡化，以及個人同經濟自由之間嘅密切關係，預計香港嘅經濟自由都會進一步下降。

面對指數連年下跌，香港政府發言人強烈反對報告中對香港人權自由度嘅不正確描述，話《國安法》訂明咗喺維護國家安全嘅時候，應該尊重同保障人權，政府會繼續堅定維護市民嘅權利同自由。

2023年人類自由指數係根據2021年嘅數據而訂，用咗86個唔同嘅個人同經濟自由指標做評比，評估範圍包括法治、宗教、集會結社同公民自由、言論同資訊、法律制度同健全貨幣等等。