警務處國家安全處（國安處）今日（14日）黃昏喺灣仔警察總部舉行記者會，國安處總警司李桂華同高級警司洪毅出席，公佈一批因涉嫌違反《港區國安法》而被通緝嘅名單，除咗早前嘅8人之外，再通緝多5名已經離港潛逃嘅人士，包括鄭文傑、許穎婷、邵嵐，以及開設YouTube頻道「升旗易得道」嘅蔡明達同霍嘉誌，每位懸紅100萬元。佢哋涉及嘅罪行包括勾結外國或境外勢力、危害國家安全等。李桂華指責呢班人出賣國家，唔顧香港人利益，行為卑劣，強調國安處會追究到底。

33歲嘅鄭文傑涉嫌同其他人成立政治組織，喺社交平台多次鼓吹香港獨立。鄭同24歲嘅許穎婷、邵嵐，都涉嫌要求外國對中國、內地同香港官員、本港司法人員作出制裁等行為。

42歲嘅霍嘉誌同46歲嘅蔡明達涉嫌同其他人開設社交頻道，多次發布影片，呼籲加入外國軍隊或組織軍隊，並喺外國接受軍事訓練，以武力對抗香港特區政府，鼓吹港獨，逼使香港政權改變，同埋呼籲外國制裁香港等。

國安處又提到，昨日（13日）拘捕兩男兩女（29至68歲），涉嫌違反《港區國安法》第41條以金錢資助他人實施分裂國家。佢哋報稱身份有電梯技工、補習老師同退休人士，涉嫌喺2020年12月至2023年11月期間透過付費資助通緝人士羅冠聰同許智峯嘅網上訂閲平台，金額由1萬至12萬元不等，資助對方進行危害國家安全嘅活動，調查顯示佢哋瀏覽咗羅冠聰同許智峯嘅帳戶，佢哋現正被扣查。

而之前被通緝嘅8名人士，警方接獲逾500宗舉報，部分相當有參考價值。對於前香港眾志副秘書長周庭早前決定棄保，李桂華表示，警方同被捕人講保釋條件係「有傾有講」，唔點名提到周庭聲稱要去海外升學，出示大量文件證明，又聲稱會返香港報到。如果佢唔履行承諾就係講大話同誠信破產。李桂華話，周庭暫時未犯法，但如果佢指定時間未返香港報到，警方將會視佢為逃犯，並會進行通緝。

湯家驊喺接受《Yahoo 新聞》查詢時表示，被捕四人犯法意圖明顯，因為羅冠聰同許智峯不單止被通緝，仲繼續做違反國安嘅行為，「差唔多每日喺度犯罪，你仲去俾錢訂閱佢哋嘅頻道，明顯理解到呢啲錢會用嚟繼續犯罪。」佢話，就算被捕人士解釋話對有關金錢嘅利用不知情，都可能難以說服法官。

湯家驊亦提到，現時喺YouTube發佈影片，製作者可以根據觀看次數賺取YouTube收入，被問及市民觀看受通緝人士嘅YouTube影片，或其他形式可以賺取金錢嘅影音平台，是否有機會犯法。

佢指出，如果市民不斷觀看呢啲影片，「你係希望令頻道，因為你不斷收睇或者好多人不斷收睇，而增加收入，而收入明知道係有機會用嚟犯罪行為，其實（觀看）都係一種援助，都係有機會犯法。」但佢補充，是否犯法亦要視乎市民嘅觀看程度，很難一概而論。