反修例運動至今仲有約6000名被捕者未被起訴，社會有聲音要求政府為案件「劃線」處理，但律政司長林定國認為咁樣唔符合法治原則。林定國話，呢批未被控嘅人並無額外限制，可以正常生活，照樣讀書、返工同出國旅遊。佢強調，對於涉及嚴重刑事案件嘅檢控係無時限嘅，日後若有新證據出現，案情隨時有可能再被檢視。

香港教育大學公共行政學顧問張炳良早前建議政府可以「劃線」，認為咁樣有助改善香港國際形象，但林定國就表明呢種做法唔符合法治精神，指出律政司會根據檢控守則同現有證據作決定，無證據就唔會亂嚟。佢話過去都試過有案件因為新證據浮現而改變決定，可能由唔起訴變成起訴，又或者由起訴改為唔起訴，律政司會以法律依據作出適當嘅檢控決定。

近年香港法治受到西方國家批評，林定國認為背後係地緣政治因素，有啲國家對香港帶有偏見，無論講乜嘢都會比負面評價。佢話，根據《港區國安法》，律政司有權決定由三位指定法官代替陪審團審理國安案件，咁嘅做法唔係隨便決定，係視乎案件有無涉及國家機密等因素。佢強調律政司係依法辦事，並唔會為咗迎合外界觀感而改變司法程序，亦唔係為咗討好其他人。

另一邊廂，警務處處長蕭澤頤喺26日接受電台訪問時話，佢過去曾到懲教署探訪入獄嘅反修例年輕人，甚至同啲出咗獄嘅年輕人接觸，發現大部分人都後悔，覺得當時畀人利用咗，認為呢個情況有改善嘅趨勢。

蕭澤頤話，探訪呢啲年輕人嘅時候，通常會同佢哋父母一齊去，見到好多都係草根階層出身，有啲家長辛辛苦苦供書教學，甚至已經讀緊大學，睇住呢班年輕人被人煽動犯事，對佢哋嚟講真係沉重打擊。

佢強調，如果呢班年輕人真係後悔，亦都已經承擔咗法律責任，社會應該畀佢哋一個機會，「如果唔畀機會，最開心係邊啲人？咪就係背後煽動嘅嗰班人囉，迫到啲年輕人無路可走，最後成個社會都變咗輸家。」

佢仲話，警隊唔係要求呢啲年輕人一定要支持警隊，但一定唔好再犯法，因為一旦再犯，警隊一定會執法，「我唔係expect你一定要支持我哋警隊，但你唔好再去犯法，因為你犯法，最受害嘅始終係你自己同你屋企人。」

此外，蕭澤頤提到警隊現時加緊安裝閉路電視，並指出全球好多城市都有CCTV，例如新加坡已經裝咗超過9萬支，2030年會增至20萬支；英國倫敦喺90年代已經開始安裝，依家市內超過80萬支。

佢表示，預計今年底會喺全港安裝615組閉路電視，至本月中已經裝咗476支，成功破獲38宗罪案，估計到月底應該增至42宗，包括謀殺、行劫同爆竊等案件。佢希望明年底能夠安裝到2,000組，以後每年再加裝2,000至2,500組，除咗防罪滅罪同增加阻嚇力之外，亦都可以幫手進行人流管制。