中國江西省南昌市委政法委微信號「平安南昌」近日發佈消息，披露南昌縣一宗破壞軍婚案件，主角係喺杭州服役嘅軍人李某，懷疑妻子同一名男子龔某同居。呢件案件引起南昌縣人民檢察院同公安機關高度重視，隨即啟動「涉軍類案件專人辦理提前介入機制」，最終成功偵破。

根據案情，李某同妻子陳某係今年3月經家人介紹而結婚，但未幾，陳某同龔某就喺南昌縣向塘鎮保持同居關係。李某5月底發現後報案，由於自己喺杭州服役，取證有難度，杭州軍事檢察院就通報南昌縣人民檢察院。南昌縣人民檢察院隨即主動聯絡軍方同受害人李某，並會同公安機關進行會商，最終案件得以快速偵破。

根據「平安南昌」描述，龔某被捕後，承認咗自己同陳某同居嘅事實，並表達咗悔意，簽署「具結書」認罪認罰。對於呢宗破壞軍婚案，南昌縣人民檢察院已正式向法院提起公訴，並向法院提出量刑建議。

文章強調，軍人婚姻家庭有其特殊性，因為軍人長期喺軍營服役，肩負守土重任，佢哋嘅家庭難以享有普通家庭嘅平穩。軍婚遭破壞，唔止係侵害軍人權益，更影響部隊穩定同國防利益。對軍人家庭嘅破壞，不但係道德上嘅問題，法律上都要接受嚴厲嘅制裁。

根據中國刑法第259條「破壞軍婚罪」嘅規定，明知對方係現役軍人配偶而同其同居或結婚嘅，最高可判三年有期徒刑或拘役。

破壞軍婚罪係一種只喺中國內地存在嘅重婚罪，專門針對非軍人同軍人配偶之間發生嘅嚴重婚外行為，例如重婚或者公然同居，一旦情節嚴重，就會被追究刑責。不過呢種罪名喺中國以外嘅地方少有，其他國家一般無明文規定破壞軍婚罪，主要係由軍隊內部紀律處理，懲罰對象通常係涉及婚外關係嘅軍人自己，而非第三者。

軍婚，即係同現役軍人成為合法配偶嘅婚姻關係。現役軍人，指嘅係擁有軍籍，並且喺解放軍或者武警部隊服役嘅人。法律規定，假如軍人配偶同其他人發生婚外情，但冇公然同居或者結婚，並唔構成破壞軍婚罪，頂多算作婚外出軌。從法理角度嚟講，呢啲行為仲未去到破壞軍人婚姻嘅程度，只屬一般嘅婚姻不忠。《I》