美國商務部周二（2日）公佈新嘅出口管制清單，將六間公司列入貿易限制名單，原因係「違反美國國家安全或外交政策利益」，其中四間涉及訓練中國軍隊。六間公司中有兩間公司喺中國香港，一間喺南非，兩間喺阿聯酋，一間喺英國。

被美國加入出口管制清單嘅香港公司包括Global Training Solutions Limited同Smartech Future Limited（別名Balloons SMT），呢兩間公司係喺香港註冊嘅「空殼公司」，同「南非測試飛行學院」有聯繫。

「南非測試飛行學院」去年遭美國政府指控，用西方政府同北大西洋公約組織（NATO）嘅資源，訓練中國軍隊。有軍事情報專家指出，呢啲受制裁嘅公司實際上係幫中國軍方招兵買馬。

據《路透社》報道，英、美、澳三國政府曾經扣留四名退役軍人調查佢哋同「南非測試飛行學院」嘅僱傭關係，其中一名前美國海軍陸戰隊飛行員杜根（Daniel Duggan）喺一份2017年起訴書中，被控訓練中國軍事飛行員喺航空母艦上降落，違反美國軍備控制法。

而遭美國政府點名嘅「南非測試飛行學院」喺佢哋網頁上表示，公司係向中國學員提供航空培訓服務嘅眾多外國公司之一，完全依據與美國同業相同嘅標準進行培訓。美國商務部指佢哋屬於「商業偏見」同「不公平的騷擾」。

華府智庫「哈德遜研究所」（Hudson Institute）亞太安全主席同前後備海軍情報員克羅寧博士（Dr. Patrick Cronin），接受訪問時指出，呢啲空殼公司看似無害，實際上係中間人幫外國政府進行招兵買馬同情報收集等間諜活動。

克羅寧指出，自習近平上台以來，中國強調「強軍」目標，但中方認為自己仍然落後於美軍，希望透過招兵買馬進行技術躍進，類似嘅中方間諜活動係一個「嚴重問題」，近幾個月佢哋已經收集到接近100宗懷疑個案，涉及利用類似漏洞進行將軍民兩用技術轉移，目的係填補解放軍在海事飛行作戰技術、建造航空母艦同航空母艦登陸技術，以及駕駛軍機喺航空母艦上降落等方面嘅不足。《I》