自2022年起，中國房地產行業氣氛跌至冰點，雖然北京當局推出「去庫存」政策，由國企收購庫存商品房，但市場依然無起色。北京大學經濟學教授姚洋喺6月25至27號喺夏季達沃斯論壇接受專訪時指出，樓價會繼續下跌，因為政府注入嘅資金太少。參照國際經驗，佢認為樓價仲要再跌40%，市場先至有機會矯正。

據台灣中央社報道，騰訊財經「經濟大家講」專欄刊登咗姚洋嘅專訪內容。佢表示，雖然當局喺上半年推出咗一系列房地產同促消費政策，但經濟表現仍然未如理想。佢調研嘅一啲企業反映「有啲恢復」，但普遍仍然等待觀望，希望政策層面可以有更大力度嘅措施推出。

姚洋認為，中國政府喺出招方面係比較謹慎嘅。首先，2008年嘅「四萬億」刺激政策造成咗好多嘅後遺症。比如各地亂建一啲項目，浪費咗好多資源，仲助長咗貪污等等。第二，當局仲係希望成個經濟唔好有過度嘅負債、過度嘅金融化、過度嘅房地產化。

佢提到，由2018年開始，去槓桿、去債務化、去房地產化嘅整體趨勢，取得咗一啲成效。如果再推出大招，可能就會抹殺呢啲成效。因此，當局推出政策比較謹慎，而且出嘅政策都係圈地式嘅，比較微觀化。例如房地產行業嘅「保交樓」，就係微觀政策，而唔係「大水漫灌」嘅政策。

姚洋預計，當局下半年可能會有新政策推出，但唔太可能係眾所期待嘅「大招」。佢認為，當局上半年呢啲政策確實產生咗一定嘅作用，但作用僅「脈衝式」。政策一發布，第二日銷售額可能就增長咗一兩倍。但一星期之後，效果基本上就消失咗。分析發現，中古屋嘅交易一直仲可以，現樓嘅交易都唔錯，但關鍵係期樓嘅交易情況唔太活躍。

佢認為，單純依靠需求側嘅政策效果有限，雖然絕大多數城市取消咗限購政策，但效果並唔顯著。原因主要在於供給側仲面臨較大風險。人哋擔心房企倒閉後，自己成為「冤大頭」。

當被問及，樓市經過半年調整，樓價係咪已經見底？姚洋指出，如果比較美國金融危機後嘅樓價，佢哋跌嘅時間快但好深，而中國嘅調整時間長但跌幅尚不足夠，日本嘅情況更為長期，一直喺下跌並跌幅較大，因此呢種調整必須跌到一定程度，市場先會反彈。就好似香港喺亞洲金融危機後樓價跌咗一半，之後先趨於穩定。

姚洋認為，樓價跌幅需要達到40%，市場先得以矯正。雖然中國政府目前判斷市場調整差唔多到位，所以要求地方採取措施穩定樓價，但佢就「潑冷水」認為樓價會繼續下跌，因為政府注入嘅資金量太少。同時，地方政府都冇積極性去擴大貸款規模，所以市場自然會繼續調整。佢又指如果畀市場自由調節，樓價必然仲會下跌。

喺房地產政策方向上，姚洋認為需求端已經完全放開，未來應該更現實地處理供給端問題，比如取消預售制度。取消預售制後，銀行應該「開閘放水」。佢建議，成立一個房屋儲備銀行，資金來源可以通過銀行發行永續債，只需支付利息即可。地方政府可以從銀行借款，收購房產，建成廉租房或保障房。《I》