立場新聞被控「串謀發布煽動刊物罪」，係 1997 年後第一宗針對傳媒嘅煽動案審訊，自 2022 年 10 月開始歷經 57 日審訊，由開審至最新判決日期橫跨近2 年，依家又再次被國安法指定法官郭偉健押後至8 月 30 日裁決。喺《連登討論區》上，有網民懷疑係咪「等中共命令掛」、「諗唔掂點入呀？」。

《法庭線》報道，本案控辯雙方於 2023 年 6 月底完成結案陳詞，原訂 10 月宣判，不過後來被押後至同年 11 月。有鑑於辯方要求法庭留意英國樞密院之前一個煽動條例判詞，以及譚得志嘅上訴案，案件裁定日期再延至今年 4 月 29 日。司法機構最新資料顯示，案件再度延至 8 月 30 日下午 2 時半裁決，估計要用 180 分鐘。據悉，控辯雙方收到法庭通知，郭偉健需要更多時間考慮判決。

案件自 2023 年 6 月底結束陳詞，原定同年 10 月 4 日裁決，不過之後改到同年 11 月 15 日。因應英國樞密院最新裁定，煽動暴力或騷亂意圖係煽動罪嘅「隱含必要條件」，控辯雙方提供書面陳詞，再進一步陳述。同時譚得志煽動上訴案，譚一方同樣爭議煽動罪需要證明鼓吹暴力元素。法官郭偉健因此將《立場》案再延至譚案有結果嘅 30 日內裁定。

控辯雙方去年 11 月，就英國樞密院案例再做進一步陳詞。控方指出，樞密院判詞提到煽動罪需要證明煽動暴力意圖，只係法官嘅「額外意見」，而千里達同香港嘅煽動罪條文唔同，加上香港 2019 年嘅修例風波，有「特殊社會情況」，唔能夠完全套用千里達嘅煽動解讀喺香港。

辯方則指出，香港同千里達嘅煽動罪，都係屬於普通法系統，「兩者同源」，而有關煽動暴力意圖嘅判詞內容，係該案憲法爭議下嘅結論，所以法庭應該採納。辯方亦指出，即使係控方所言嘅香港情況特殊，亦應該保障基本權利，「一句講晒就係言論自由」。

上訴庭於 2024 年 3 月 7 日裁定譚得志案，否決譚嘅定罪及刑罰上訴。判詞指出，上訴方引述嘅英國樞密院案例，只係附帶意見，煽動意圖需要根據特定法律框架同社會狀況詮釋，裁定煽動罪中，煽動意圖唔係法定罪嘅必要元素。

判詞進一步指出，煽動罪需要有足夠嘅靈活性，以應對當下嘅國安威脅，所以煽動意圖嘅用詞需要廣泛啲，以包含唔同時間、唔同情況，最終裁定煽動控罪，喺社會利益同言論自由之間已經達到平衡，譚得志已就定罪申請上訴至終審法院證明書。《I》