英國政府公佈香港半年報告，英國外交大臣卡梅倫喺序言批評，北京喺香港實施《港區國安法》違反《中英聯合聲明》。喺國安法下，政治異見幾乎完全唔見，唔同意見仲變成刑事罪行，公民社會被邊緣化。佢亦斥責香港特區政府，指佢哋係用消除「軟對抗」為名，針對喺支持香港同中國政府立場上出現微小偏差嘅人。

卡梅倫指出，去年下半年，香港警方向13名居於海外人士發出拘捕令，當中很多人現居英國。佢強調，《港區國安法》喺英國唔適用，而英國同香港或者中國內地冇任何有效嘅引渡協議。佢保證喺英國嘅香港社群係安全嘅，同時強調英國唔會容忍任何外國勢力企圖恐嚇、騷擾或者傷害喺英國境內嘅人。

卡梅倫又提到，《維護國家安全條例》上個月生效，指呢個條例係匆忙通過立法程序，好可能唔符合國際人權法律，同時亦對香港市民嘅權利同自由造成負面影響。佢再次重申英方希望香港當局尊重《基本法》賦予嘅權利同自由，維護高度自治，同埋依照國際承諾同法律義務去行事。卡梅倫亦再次呼籲香港政府釋放「英國公民」黎智英，同時敦促北京撤回《港區國安法》。

中國同香港特區政府則一如既往以戰狼口吻回擊。港府批評英方公然干涉屬中國內政嘅香港事務，妄圖破壞香港繁榮穩定，注定徒勞無功。又話《香港國安法》有域外效力，警方有責任依法追究在境外涉嫌干犯國安法罪行嘅人。

港府譴責英方對正在香港特區法院進行嘅刑事審訊妄加評論，不但極其不恰當，亦無視法治精神。又批評英國一直假借唔同事件、場合同藉口，惡意詆毀香港特區維護國家安全相關法律，其霸凌同雙標嘅虛偽面目和行徑，實在極其醜陋、令人不齒。

外交部駐港公署亦強烈譴責英國報告，批評係老調重彈，攻擊抹黑一國兩制，惡意詆毀香港國安法、《維護國家安全條例》和新選舉制度，粗暴干涉特區司法和法治。

公署發言人強調，任何抹黑唱衰香港嘅雜音，都撼動不了一國兩制行穩致遠嘅堅定步伐，形容新時代「香港號」列車必將一往無前，不容阻擋。

中方敦促英方尊重香港「由治及興客觀事實」，盡早放下殖民傲慢同霸道思維，奉勸英方由殖民舊夢中徹底清醒過來，認清英國在香港既無主權、又無治權、更無監督權嘅現實。《I》