伊朗支持嘅也門叛軍胡塞武裝，持續攻擊行經紅海嘅外國商船。儘管胡塞武裝曾經承諾，唔會攻擊中國船隻，但一艘中國油輪最近依然喺也門附近遭到攻擊。中國官媒《環球時報》前總編輯胡錫進趕忙為胡塞解話，話「不排除是胡塞組織打錯了」。而喺呢個關鍵時刻，解放軍駐紮喺吉布地嘅護航艦隊卻不見蹤影。

根據美國中央司令部（CENTCOM）嘅報告，伊朗支持嘅胡塞武裝，3月23日喺紅海嘅附近向一艘中國油輪「黃埔號」（Huang Pu，音譯）發射咗四枚反艦彈道飛彈，之後又射咗第5枚飛彈命中咗黃埔號，令呢艘油輪輕微受損同埋起火。

不過，喺紅海南部同胡塞武裝六架無人機交戰嘅卻係美軍。而喺呢關鍵時刻，中國海軍喺吉布地嘅第45批護航艦隊卻冇現身。

2017年，中國以「後勤支援」嘅名義，正式啟用非洲東北部亞丁灣西岸嘅吉布地，成為中國首座海外軍事基地。分析指，吉布地對北京極具象徵意義，係中國海軍走向遠洋嘅第一步，北京時不時都會拎嚟宣傳，而家嘅表現就顯得落差好大。

據央視報導，中伊俄「安全紐帶-2024」聯合演習階段，3月12至13日喺阿曼灣附近進行。而就喺中國商船遇襲當天，第45批護航編隊抵達坦尚尼亞嘅達累斯薩拉姆港訪問。

面對外媒嘅提問，中國外交部含糊其辭，亦冇回應中國護航艦隊是否會提供保護。而之前不斷報導胡塞組織襲擊美英商船同軍艦嘅中國官媒，而家卻全部保持緘默。

台灣國防院國防戰略同資源研究所所長蘇紫雲認為，呢件事反映咗北京嘅尷尬同唔負責任。

蘇紫雲表示：「「因為胡塞組織的背後是伊朗，伊朗的背後是中共，所以現在等於是小老弟打了老大哥的船，那中共外交部三緘其口，可見他們在外交上就掉進了一個尷尬的局面。因為中共它並不是認真的要負起一個大國該有的國際責任，它只是見縫插針的去搗弄國際關係。所以它這個護航艦隊，不像美國、英國或歐洲國家的護航艦隊，實際上有擊落過飛彈或無人機來保護商船，這反映出北京不負責任的態度。」

蘇紫雲指出，為咗擴張海權，發展海軍遠洋戰略，中國喺2008年左右開始派艦隊去亞丁灣執行護航，每一批次大多係維持一艘補給艦同兩艘作戰艦艇嘅規模。

蘇紫雲稱：「在戰術上，它派出去的兩艘船具有一定的反飛彈能力，包括常說的052D型的中華神盾艦，或是會搭配一艘054A的護衛艦。除了趕趕海盜之外，它對來襲的飛彈有一定的防護能力。可是，在近期並沒有看到它發揮作用。它享有波斯灣區域的原油運送跟商業航運的利益，可是它不願意真正去消滅區域裡面的迫害秩序的國家或組織，反而去支持這些國家或組織。最後自己也受害。」

不過《環球時報》特約評論員胡錫進，就喺微博發文解話此事件。他指出，由於該郵輪懸掛嘅係巴拿馬國旗，並且由英國公司 Union Maritime Ltd 註冊，唔排除係胡塞武裝「打錯了」。

對於胡錫進嘅說法，社交平台 X 《方舟子》嘲諷，「胡錫進很善解人意，為胡塞武裝辯解，他堅信恐怖組織和中國是一家，而且很講信用，說不打中國船隻就不會打，打也是打錯了。」《I》