「開封有個包青天，鐵面無私辨忠奸」，宋代名臣包拯「為民申冤」嘅正義形象深入人心，獲讚頌為「包青天」，其故鄉河南開封甚至設立「包公祠」進行供奉，香火延續六百多年。估唔到都進入21世紀，呢間包公祠最近卻出現奇觀，一群人喺包公祠大廳跪地痛哭，仲有人舉起白布條，寫下大大嘅冤字。但該祠上周六（16日）卻突然「暫停開放」，包公像亦被連夜搬走，內地民眾「有冤無處申」實在可憐。其實本港亦有一間鮮為人知嘅包公祠，《信報》昨（18日）就撰文建議旅發局，不妨考慮舉辦「包公廟主題深度遊」，邀請內地民眾來港參拜包公。

近排有一位疑似受到司法不公嘅女子喺河南省開封府景區嘅「包公祠」度跪地痛哭，被一旁嘅遊客影低，之後啲片段就喺微博、抖音、bilibili、小紅書等中國社交媒體瘋傳。

事發喺本月10日，跪地女子痛哭到令人側目，包公祠嘅管理單位之後解釋話，呢位女遊客係睇到包公太感動，先會有呢種行為。但係，一位自稱係片中女仔嘅嘅人透過微博賬號「司法腐敗鬥士abc」表示，佢跪地痛哭係因為佢喺遼寧省昌圖縣法院明明打贏咗官司，但係執行環節遇上法院執行局搞虛作假，放跑已經查封嘅財產，並讓被執行人自己私自處理，當局又故意拖延，搞到佢家破人亡，到開封散心期間諗到包公嘅公平正義，先忍唔住喺祠內大哭一場。

隨住片段廣傳，好多人都去包公祠申冤，有母女三人甚至喺「堂前」下跪喊冤。好多網友都留言話呢個現象突顯出中國司法不公不義，受苦嘅老百姓難以生存，「人間若有公理在，何須跪地哭青天」、「在上訪和上訴之間，為何選擇了上香？」包公祠一夕之間成為中國版「哭牆」，知乎論壇上早有內地網民發帖表示擔心包公祠遲早會被關閉。

果然，當局隨即下令封閉，入口大門唔單止被上鎖，現場仲有武警監控。網友影低嘅相片顯示，包公祠門口嘅告示牌寫住：「景區內部因施工維修，暫停開放」，同時都註明公告日期係3月16號。網民紛紛留言嘲諷：「包公祠都被維穩啦」、「估計全國包公廟都要拆啦」、「完了，包公變成境外勢力了」。

《信報》文章分析，包公祠突然「爆紅」，恐怕亦反映內地民間「冤情」高漲，皆因隨着經濟放緩，社會上各種爭端相應增加。與此同時，地方政府「維穩」壓力愈來愈大，看待輿情猶如驚弓之鳥，防民之口甚於防川，連既有嘅上訪渠道也多阻障，並舉例指有些內地嘅地方政府派人專門「截訪」，務求達到「零上訪」KPI。

其實香港特區亦有一間「包公廟」，位於灣仔隆安街2號（石水渠街公園旁）。資料顯示，該廟建於1862年，緣於當時港英政府貪污風氣嚴重，產生唔少冤假錯案，鄉親父老遂為出名清廉公正嘅包拯設廟供奉，一來希望提倡正氣，二來讓市民有機會宣洩怨憤。

除咗本地民眾進香，早年殖民地政府部分官員赴港履新時，亦有「入鄉隨俗」前赴包公廟參拜，以示自己上任後定必「秉公辦事」。然而，該廟後來逐漸少為人知，香火不及以往鼎盛，或因港英政府先後設立咗廉政公署、申訴專員公署、審計署等「衙門」，令市民唔駛再搵包公訴冤。

《信報》文章建議，今次開封包公祠總壇「暫停營業」，香港旅發局不妨考慮舉辦「包公廟主題深度遊」，邀請內地民眾來港參拜包公，並可透過AR擴增實境技術，提供狗頭鍘、展昭、張龍趙虎等配套，讓內地旅客沉浸式體驗申冤過程。文章最後諷刺咁話，即使「宋朝的鍘」很難對付今朝嘅官，起碼可帶來精神慰藉，「說不定在小紅書上大受歡迎呢」！《I》