昔日「中國大好友」、大摩亞洲區前主席羅奇早前稱「我很痛心咁話，香港已玩完」引起熱議，唔少港府官員都撲出來反駁，行政會議召集人葉劉淑儀更化身「反駁隊長」去信英國《金融時報》，將香港股市下跌歸因於美國加息同聯邦退休基金不再投資香港嘅「政治決定」，又話羅奇已多年冇到訪香港，歡迎佢再次訪港親身經歷「香港如何繼續繁榮發展」云云。對此，羅奇發文指自己多年嚟定期訪港，見到好多公司撤離同人才外流，直言「香港輝煌時代現在可能已結束」。

羅奇（Stephen Roach）13號喺《金融時報》發表咗一篇名為「我好痛苦地講香港已經完結」嘅文章，講緊香港衰敗嘅三大原因：香港本地政治、中國因素同埋國際發展，其中最主要係美中競爭。

羅奇之後接受外媒訪問時表示，除非中國解決自己嘅經濟問題，反則香港就會完結晒；如果中國想要令香港嘅未來更好，就應該俾香港自己管理自己。羅奇嘅言論喺香港掀起咗熱議，引起唔少港府人士嘅反駁，行政會議召集人葉劉淑儀就同樣喺《金融時報》撰文反擊，稱聯儲局加息同其他美國政策係香港股市困境嘅「根本原因」。政務司司長陳國基就喺電台節目上稱羅奇嘅言論係「嚇唬人」。

羅奇喺佢嘅X帳號反駁指，將香港股市過去26年嘅停滯歸咎俾美國聯儲局（FED）呢兩年嘅緊縮政策係「荒謬」嘅，聯準會嘅緊縮政策已經接近尾聲，香港嘅問題係香港自己同埋北京造成嘅。

羅奇23號喺個人網頁發文，指金融時報嘅文章標題誇大咗，冇咩國家、城市或經濟會絕對「結束」，或者已經完結，或者處於最終消亡嘅狀態。但呢個標題對於一個長期以嚟自稱為亞洲國際城市、中國嘅窗口、亞洲四小龍之一嘅香港，係敲響咗警鐘。

羅奇話，佢喺金融時報發表嘅文章講緊香港嘅輝煌時代可能已經結束。佢重申，香港本地政治、中國因素同埋美中競爭嘅三大因素，同埋強調自2012年返回美國後佢經常到香港，2023年曾到香港3次，金融時報嘅文章係佢親身體驗到而家香港嘅最新印象。

羅奇又話，最困擾佢嘅，係佢喺香港睇到同睇唔到嘅，好多朋友因為2019年嘅政治動盪而離開香港，好多喺香港嘅公司都撤離，而家仲留喺度嘅開始討論應急方案，分散喺香港嘅業務風險，直言人才外流嘅風險係真實嘅。佢又指，雖然佢大部份有聯絡嘅社交圈仍喺香港，但大家對香港未來嘅焦慮日益增加。香港以往嘅活力同無限樂觀精神，已經被削弱。

事實上，香港近年多項指標確實反應香港嘅輝煌時代可能已結束。港股方面，香港股市近年嚟持續低迷，特別係一啲重要企業嘅股價驚人嘅下跌，已經令人擔憂。唔單止快手、嗶哩嗶哩等科技巨頭股價暴跌，連半導體、電動車等產業嘅領頭羊都冇法倖免，呢啲反映出資金嘅大量流出同埋市場信心嘅嚴重缺失。

樓市方面，香港樓市自去年開始持續下跌，至今仍未見底。2023年香港住宅價格比前一年下跌7%，而商業房地產則受到寫字樓需求減少同利率上升影響，恆生地產分類指數下跌咗42%，超過恆指28%嘅跌幅，過去兩三年樓市交投量更係過去30年來最低。

財政方面，四大會計師行之一嘅德勤Deloitte預測，2023/24政府財政赤字將達1172億港元，比港府原先預估嘅544億港元高出一倍多；澳洲會計師公會更預期，赤字將達1270億元。

人口方面，《經濟學人》最近報道，香港嘅750萬人口之中，近年大約有20萬人離開咗香港，造成人才外流。英國BN(O)簽證計劃，截至去年第三季，已累計超過19萬人申請，預料今年將突破20萬人，移民潮仲會繼續。《I》