藝人李龍基嘅未婚妻王青霞Chris黑材料不斷，由才女淪為「大話情人」，再驚爆涉逾期居留被拘捕。最新消息指佢被控逾期居留、使用虛假文書等6罪，今（20日）解往沙田裁判法院提堂。辯方替被告保釋，遭裁判官拒絕。身在廣州嘅李龍基回覆傳媒時痛哭起來，表示「一定支持佢」又話「結婚承諾一定唔會變」。

控罪資料指出，王青霞涉嫌於舊年申請入境證時，虛偽聲稱持有工程學碩士學位，並使用虛假畢業證書。除此之外，王涉及兩次逾期留港，分別逾期3年1個多月，同埋9個多月。王青霞面對的6項控罪包括：一項為取得入境證時作出虚假陳述、一項使用虛假文件、一項管有虛假文件、一項向入境主任作出虚假陳述，同埋2項違反逗留條件罪，總共6項罪名。

王青霞被控取得入境證時作出虚假陳述同埋使用虛假文件罪，指她於去年10月23日，在申請入境證時作出虛假陳述，聲稱喺萊頓大學獲頒發工程學碩士學位，同時使用三份虛假嘅Pacific States Aviation嘅畢業證書。

至於違反逗留條件同埋向入境事務主任作虛假陳述罪，指她於去年3月26日，違反只可以留港至舊年2月9日嘅逗留條件。同一日，她亦涉及向入境事務主任作虛假陳述，即佢於3月26日前數日由內地經港珠澳大橋入境。

另一項違反逗留條件同埋管有虛假文件罪，指她於去年2月17日，違反只可以留港至舊年4月24日嘅逗留條件，同時管有三份虛假、看似由Pacific States Aviation發出嘅畢業證書副本。

佢今日束馬尾到尾到庭，戴上口罩，穿住黑色大褸，神情憔悴。控方表示準備好聽取被告答辯，但辯方要求案件押後，等取得文件同埋向被告提供法律意見。律師有為被告申請保釋，但遭裁判官拒絕。

李龍基昨晚接受訪問表示，在前（17日）先知道咁大件事，當日佢同Chris喺屋企，突然一班入境處人員入屋，先知道Chris逾期居留，令佢震驚不已。李龍基坦言事件對佢打擊很大，甚至哽咽痛哭表示得這事可能因為佢引發而起：「如果佢唔係因為我，或者唔會逾期，佢唔捨得我……佢舊年嚟，之後疫情來回要14、21日（隔離），可能佢因此諗歪咗，又唔同我講。」

佢喺電話中講：「我要錄影節目，已經簽咗約唔推得，21號會趕返香港，佢身邊冇人冇物，我搵咗謝偉俊律師陪佢，我身邊好多朋友陪住我，唔使擔心。」問到驚唔驚未婚妻要入獄？佢講：「而家唔係驚，係擔心，但詳情唔講得，希望將所有傷害減到最低。」

此時電話中傳出哭泣聲，情緒平復後，佢繼續講：「我一定支持佢，一定支持！佢成日乜都唔講，收收埋埋，可能怕我擔心佢，唔畀我同佢分擔，佢唔捨得離開我。（結婚承諾係咪不變？）一定唔會變。」

雖然李龍基好似講到情深不已，但網民就有唔同解讀。有網民諷刺佢：「中左桃花癲」、「提款基」、「基哥幾次先會醒」。亦有網民認為其實李龍基只不過做緊戲：「條友想脫罪啦，窩藏罪犯，如果知情，即屬違法！」、「佢心諗，大陸妹想伏我」、「基哥心諗做慣皇帝架，你估古代啲皇帝真係傻架」。《I》