香港除咗係國際金融中心同貿易重鎮，而家都面對住購物天堂地位受挑戰嘅情況。根據港府數據，去年整體零售總銷售額同埋三大奢侈品銷售額，同比2018年分別減少16%同埋29%，而四大核心區嘅空置率亦高企，達到9.7%，遠高過2018年嘅5.6%。同時，香港面對大陸嘅競爭，特別係「海南免稅區」成為奢侈品新興重鎮，去年嘅免稅購物金額達到近500億港元，遠超過香港全年嘅零售總銷售額。有分析認為，香港對大陸消費者吸引力不足，如果港府繼續推行高壓政策，可能令香港購物天堂地位岌岌可危。

至於香港能否喺疫情後恢復，保住購物天堂地位？首先要睇下過去一周農曆新年黃金周嘅表現。記者分別到旺角、銅鑼灣同尖沙咀實地考察，發現人流雖然唔少，但係仍然比唔上疫情之前街道擠得水泄不通嘅情景。而情人節之後，尖沙咀廣東道雖然仍然有唔少大陸旅客，但部分傳統名牌店如LV、GUCCI等店外排隊嘅人數亦只係10幾人，同疫前2018年高峰期時相比，明顯少咗好多。

根據香港入境處數據，新春假期期間共有逾192萬人次入境，其中大陸訪客佔約33%，達到逾65萬人次。至於銷售方面，港府暫時未有公佈，不過香港零售管理協會主席謝邱安儀透露，新春假期期間化妝品同鐘錶珠寶銷售額有低雙位數增幅，但整體仍然係低迷，奢侈品消費更是大幅減少，仍未回復到疫情之前嘅水平。

謝邱安儀表示：「不同長假同暑假，都見到同一現象，就係現時嘅消費力比疫情之前弱咗好多，唔似以前咁大量嘅中國遊客，而且高價位、奢侈品嘅消費量已經明顯減少。」

至於同2018年疫情之前全面復甦相比，根據港府統計處、入境處同美聯工商舖研究部嘅數據，去年香港整體零售總銷售額接近407億港元，而三大奢侈品類別嘅銷售額總共約237億港元，同2018年相比分別減少16%同埋29%。

至於四大核心區嘅街舖空置率，2023年雖然有所改善，由2020年嘅歷史新高12.6%（945間吉舖）回落到9.7%（727吉舖），但仍然處於高位，遠高過2018年嘅5.6%（421間吉舖）。

Euromonitor國際數據顯示，香港係全球熱門奢侈品城市排名第二，僅次於東京，而去年又再次成為全球人均奢侈品消費額最高嘅市場。

香港嘅高端購物地位受到大陸城市嘅威脅，尤其係新興嘅「海南免稅區」。據大陸海關數據，隨住海南不斷放寬免稅限額、折扣促銷、免稅品種類同埋「線上+線下」購物方式，春運以來進出海南嘅旅客量按年增長逾30%，年初一至初四海南離島免稅商品銷售金額達到12.17億元人民幣，人均消費達7800元人民幣。

根據《新華社》報道，2023年海口海關監管海南離島免稅購物金額達437.6億元，較上年增長25.4%；購物人數達到675.6萬人次，增長59.9%；購物件數達到5130萬件，增長3.8%；人均購物金額達6478元，主要涉及化妝品、香水、衣物同埋手袋等，數字遠超過香港。