特朗普政府正草擬禁令，禁止進口中國製嘅新型數據中心組件，以保護支撐人工智能熱潮嘅基礎設施。負責監管美國電訊業嘅聯邦通訊委員會（FCC）正制定措施，禁止新型號中國光收發器（俗稱光模組）輸入美國；呢種組件可以令數據喺數據中心內部嘅光纖電纜以光速傳輸。官員希望今年內公布禁令並即時生效，以防中國企業喺承載AI晶片嘅美國數據中心竊取數據、植入惡意軟件或干擾運作。不過消息人士強調，FCC仍有可能修改甚至擱置有關限制。

華府對華鷹派今次出手，明顯係想避免重蹈華為覆轍，當年華為電訊設備已深深嵌入美國基建，事後拆除費時失事、成本高昂。華盛頓顧問公司Beacon Global Strategies人工智能政策專家考希克（Divyansh Kaushik）認為，收發器確實構成風險，隨住數據中心建設規模擴大，供應鏈必須一開始就確保安全。白宮同FCC未有回應置評請求；中國駐美大使館就敦促美方「傾聽兩國工商界客觀理性嘅聲音」，停止抹黑中國企業同威脅制裁，仲話對任何損害中國利益嘅實質行為，中方將採取一切必要措施應對。

首當其衝嘅係光收發器龍頭中際旭創（Zhongji Innolight）。據Counterpoint Research數據，該公司佔全球數據中心光收發器市場27%份額，今年6月已被五角大樓列入「中國軍事企業」清單；矽谷智庫美國創新基金會報告指，美企相干（Coherent）同朗美通（Lumentum）技術雖有競爭力，但規模未足以取代中國供應商，而中際旭創九成收入來自中國以外市場。

消息一出，美股光通訊板塊周二應聲炒起：應用光電（Applied Optoelectronics）飆約16%，相干升約13%，朗美通升約11%，康寧（Corning）亦升約8%；分析指雲端巨頭或被迫轉單，成本難免上升。事實上，FCC近月已接連向中國無人機、路由器、逆變器同機械人開刀，全部依據國會設立嘅「受管制清單」（Covered List）行事，做法係先禁所有新型號、再豁免非中國供應商。內地方面，消息周二晚傳出後，「光模塊」、「中際旭創」等關鍵詞一度衝上熱搜；中金公司通信團隊就潑冷水兼派定心丸，話短期難免衝擊情緒，但中長期大概率「雷聲大雨點小」，因為光模組只負責光電訊號轉換、唔儲存業務數據，FCC嘅安全邏輯能否成立值得商榷，加上中國龍頭早已喺泰國等地設廠，北美出貨基本來自海外產能，而中國供應商佔海外高速光模組訂單平均七至八成，全面脫鈎只會拖慢北美數據中心建設，因小失大。