日本宮內廳公布，現年91歲嘅日本上皇明仁，將會喺聽日（6日）入院，進一步接受詳細嘅心臟檢查，原因係早前檢查顯示有可能出現「心肌缺血」情況，即係心臟肌肉因血流不足而可能導致功能異常。本來上皇明仁原定今個星期四會連同上皇后美智子，一齊前往神奈川縣葉山嘅御用別墅休養，但而家呢個行程要押後，先處理好身體狀況。

據《朝日新聞》等多家日本傳媒報道，明仁喺4月中曾經去宮內廳醫院做例行體檢，期間醫生發現佢可能出現冠狀動脈供血不足問題，影響到心肌運作。跟住再做進一步檢查之後，醫生認為出現「心肌缺血」嘅可能性相當高，於是決定安排佢住院再作詳細檢查。

消息人士透露，雖然上皇目前未有明顯病徵，精神狀況都算穩定，但為審慎起見，預計會住院幾日接受檢查。

上皇明仁近年身體狀況時好時壞。早喺2012年2月，佢曾經接受心臟繞道手術（俗稱「塔橋」手術），改善心臟血流情況。去到2022年7月檢查時，又被發現右心功能衰退，需要長期接受治療，醫療團隊一直密切監察佢嘅健康情況。