根據台灣《中央社》17號報導，中國電商平台在過去幾年，會在6月18號大肆宣傳購物節，不過今年「618電購節」退去繁華，消費者反應冷淡，取而代之嘅係「理性消費」，不再追求往年嘅「大買特買」。有分析指，中國消費者在經歷過去10幾年嘅「烈火烹油」之後，電商大促銷熱潮似乎已冷卻，不只商家難以帶動購物，消費者嘅「期待感、新鮮感」亦劇烈下降。

「618購物節」源於中國電商巨頭「京東」嘅週年慶，「京東」成立於1998年，過去多會在公司誕生日6月18日搞週年慶大促銷，之後包括「淘寶、天貓、蘇寧、拼多多」等電商，亦選擇在同一日加入戰局，618先成為網購商在1111之外，另一個「年中」購物節。報導指出，今年618來臨之前，多間中媒以「靜悄悄」來形容今年嘅「購物節」氣氛，各大網購平台大改常態，由高調宣傳轉為低調，過去主要幾個「大台」，影響力亦大不如前。

財經媒體「鋅財經」引述專家口述指，購物節「遇冷」源於消費潛能被「消化」（多行業被嚴打），加上市場消費「疲勞」（經濟持續下行），網購商宣傳同實際「有差距」，線上購物「弊端」逐漸浮現，消費者更注重實體體驗及服務。報導指出，消費者經歷10幾年電商「烈火烹油」嘅大促銷後，期待值、新鮮感雙雙下降。有平台商家為咗留住消費者，開始瘋狂在細節上競爭，「玩法、動作」等走向過度一致，好似「冇新故事可講」一樣，令消費者感到厭倦。

報導認為，造成消費疲倦嘅原因，同電商「造節」頻率過高有關。尤其在近幾年，由年中618至年末雙11，幾乎月月都有各類大小購物節，舉例有：天貓「五一促銷、510週年慶、520禮遇季」，同618購物節「高度」無縫銜接，消費者已感受唔到「大促銷」嘅刺激。有統計顯示，截至舊年為止，多個主要電商嘅618全網交易總額，其增速已連續3年放緩，舊年嘅年增率只有14.77%，增速係近3年最低。618嘅「邊際效應」正加速遞減，能創造嘅價值亦無法同過去相提並論。