法國總統馬克龍（Emmanuel Macron）喺上個月公開表示「不排除派兵烏克蘭作戰」，其言論令俄羅斯相當不滿，法俄關係變得更加惡劣。昨日（21日），俄羅斯國家杜馬（議會下議院）副議長托爾斯泰（Pyotr Tolstoy）喺公開場合表示，莫斯科當局正研究用核武器攻擊法國首都巴黎，令外界嘩然。

俄羅斯入侵烏克蘭已經超過2年。戰爭初期，馬克龍嘅對俄態度比較溫和態度，但近期就從鴿派轉向鷹派，喺上個月，巴黎同西方領袖同官員會談後，佢表示不排除派遣西方部隊參與烏克蘭戰事，同時表示會竭盡所能阻止俄羅斯贏得呢場戰爭。

呢個消息引起國際間嘅廣泛討論，好多人擔心如果西方真係介入烏俄戰爭，會令第三次世界大戰嘅風險增加。其後美國、德國、波蘭、捷克等北約成員就表示，無意派兵烏克蘭，法國政府官員都出來澄清，話馬克龍只係想向俄羅斯總統普京（Vladimir Putin）展現佢嘅決心。

但俄羅斯對馬克龍嘅表態非常不滿，唔單止俄國對外情報局局長納雷什金 (Sergey Naryshkin)威脅，話如果法國真係介入，法軍就會成為優先打擊目標，而尋日法國BFM電視台刊出嘅訪問，俄羅斯杜馬副議長托爾斯泰就更直言表示「我們正在計畫向巴黎發射核彈的可能性」。喺俄烏戰爭開始以來，俄方就多次以核武威脅西方。

另一邊廂，英國國防部宣布，第一批經過英國空軍培訓嘅烏克蘭飛行員已經結訓，之後會去法國參加進階課程，為將來接受F-16戰機實戰訓練做好準備。

呢批飛行員喺英國接受咗密集嘅基本飛行技能、地面課程同埋英文訓練，包括低空飛行、高級編隊飛行、航空醫學同科學等等。英國喺舊8年月開始培訓烏克蘭空軍，而家第一批學員已經完成訓練，都係有實戰經驗嘅飛行員；而今日結業嘅主要係一啲無實戰經驗嘅飛行員。呢啲訓練將有助於提升烏克蘭飛行員嘅整體能力同埋作戰效率。

英國國防部估計，烏克蘭今年夏季或之前會收到第一批F-16戰機，呢代表烏克蘭同西方國家喺軍事援助方面嘅合作更進一步。去年7月，英國同其他11個國家成立咗援烏戰機同空戰能力聯盟，協助烏克蘭加強空軍實力，提高應對俄羅斯侵略嘅能力。