根據台灣《中央社》11號報導，在美中關稅戰之下，尋日10號中國南北多個碼頭駛向美國嘅貨輪訂艙量大跌逾半。香港《明報》今11號報導指，美中關稅戰升級後，美中之間貿易隨即「冰封」，浙江金華一名生產 聖誕裝飾嘅廠家話，今年冇任何美國客落單。

報導又引用中國財媒《財新網》消息指，上海港尋日「幾乎已不見駛向美國嘅貨船」。據轉述，作為全球最大貨櫃碼嘅上海港，前幾日仲有大量自美國趕來嘅貨輪忙著裝貨，望搶在新關稅實施前出港，但有洋山碼頭職員話，目前洋山島外堆積無數趕唔及發出嘅貨櫃，等待貨主做退關處理。

《明報》並引述從事中美海運及物流業務嘅人士話，所謂「上海港已冇出發美國貨船」嘅說法有小小誇張，但佢同業內小範圍人士會商後得知，尋日由中國南北多個碼頭出發前赴美國嘅貨櫃輪，訂艙量下跌超過一半。

該位物流人士話，關稅戰難以預料，部分貨物恐因買家放棄購買，到美後仍將被退返，而大部分貨主已選擇暫停出貨，繼續觀望局勢變化。佢指出，相對在美國總統宣布對大部分國家延遲實施「對等關稅」後，「中越」雙邊貨運變得十分興旺。