根據台灣《自由時報》9號報導，台灣知名法醫 高大成近日在其位於台中嘅診所外，懸掛紅底白字寫上「我繳稅不是為了養共匪」嘅橫幅布條，以此強烈表達對部分台灣政界人士親中行徑嘅不滿，並呼籲政府、社會各界，正視中共對台嘅滲透及威脅。

高大成表示，台灣當前正面對中國各種「文攻武嚇」，包括中配 亞亞等人嘅武統言論，以及部分國民黨立委嘅親中行徑，令其對此感到憤怒、憂心。高醫師認為，身為台灣納稅人，有權關心政府如何運用財政資源，絕不容許人民血汗錢變相去支持「敵對勢力」，不應默許國家資源被「用於包容甚至支持親中勢力」。

高大成直指，之所以咁樣做，並非為咗要挑起對立，而係要喚醒大家對納稅錢流向嘅關注。我哋不應用人民嘅納稅血汗錢，去迎合一個打壓我哋、威脅我哋嘅共產政權。高大成話，對岸嘅本質未有改變，台灣更應堅定守護自身嘅主權及自由。

該布條一出，引起唔少網友及路過民眾熱烈反應，有人拍照轉發並留言話「你講出人民心聲、佩服你敢言精神」。亦有人呼籲「理性對話、勿簡化兩岸議題」。高大成對此表示，純粹係要盡一個公民及納稅人嘅責任，監督政府政策走向，捍衛台灣嘅民主價值。佢直呼：我交稅係要等國家更加好，而非去餵養嗰啲想出賣台灣嘅人。