根據台灣《中央社》6號報導，第2屆香港人權作品展4月1號至6月29號在台灣台北「228國家紀念館」舉行。策展人 黃國才表示，每一個挺身而出嘅人都值得記住，雖然佢哋失去自由卻未曾放棄希望，而我哋身處自由更應堅守信念，為港台民主自由去奮鬥。

第2屆香港人權作品展6號舉行開幕記招。在開幕式上，228國家紀念館館長 藍士博、香港人權連線成員 赴湯、人權倡議者 李明哲、華人民主書院協會理事長 賴榮偉、香港邊城青年理事長 馮紹天等人出席致詞。

赴湯表示，香港自由崩壞速度之快無法想像，望藉由展覽可以令大家知道香港現狀，亦可了解到擁有民主自由並非理所當然，並好好反思台灣現時嘅民主自由，唔好將其變成第二個香港。

赴湯並向香港人表示，前路雖然黑暗、充滿挑戰，但期待港人可以來到這個展覽，因為展覽冇審查及監控，冀望大家唔好在呢個時候放棄。

馮紹天在致詞時話，作為一個流亡在台嘅港人，港人並非只為逃避而來台灣，台灣依然係有自由空間、有希望可同台灣嘅朋友去對抗中國。

在228國家紀念館三樓展場，除咗照片、圖片等作品，會場一角展示出多封已刑滿出獄嘅抗爭者及政治犯捐贈信件，呢個係在囚期間同牆外人聯絡嘅書信，透過唔同方法講述真實嘅香港故仔。

展廳並展示有作品「一日一蘋果」，2021年6月24號《蘋果日報》被迫結業，創作者將當日出版嘅最後一份《蘋果日報》摺成蘋果狀置於窗前，以作悼念。而時間轉眼過去4年，「蘋果」亦隨歲月泛黃，警惕不忘當日。