根據台灣《自由時報》25號報導，美國總統 特朗普同其高級顧問、億萬富豪 馬斯克（Elon Musk），聯手推動嘅聯邦政府改革，裁撤大量政府機構人員，導致無數熟識「國防、經濟、能源」等內幕知識嘅聯邦雇員因此失業。國家安全及情報專家對此警告，該動盪為俄羅斯、中國等對手國提供前所未有嘅機會，並藉此機會招募線人。

《德國之聲-中文網》報導指，前白宮首席訊息官 佩頓（Theresa Payton）表示，每一名曾接觸或掌握敏感訊息嘅前聯邦雇員，都可能成為情報機構嘅目標。成千上萬名經驗豐富嘅政府官員，同時因此失業時，美國嘅反間諜體系將面臨巨大挑戰。佩頓指，佢哋所知嘅訊息極有價值，「俄中」等組織犯罪集團，必會積極招募呢啲人。

據報，裁員潮不僅影響情報機構，亦可能波及多個掌握敏感訊息嘅政府部門。美國貿易代表辦公室長期負責貿易談判工作，並掌握著大量涉及國際經濟博弈嘅核心訊息。如果相關人員流失，敵對國恐會利用有關訊息，削弱美國嘅經濟競爭力。

而聯邦政府檔案部門，保存有大量情報機構嘅機密行動紀錄，以及秘密特工嘅身份訊息。如果啲數據管理人被解僱或離職，訊息安全風險將大幅上升。

尤其國防部資料庫涵蓋大量美軍戰力、行動部署、戰略情報，任何一名曾接觸上述數據嘅人，都可能成為外國情報機構嘅「招安」目標。此外，能源部掌管美國最機密嘅核武器情報，一旦相關人員因裁員失業，美國嘅核安全體系恐面臨前所未有嘅威脅。

美國前國安局反情報官 辛德勒（John R. Schindler）警告：即使在正常時期，我哋同會遇到個別因經濟或個人原因投靠外國嘅情報員。但而家，由於政府大規模裁員，啲風險被推到新高度。辛德勒指出：隨著越來越多聯邦雇員失業，被外國勢力策反嘅機率正在上升，而敵對國正急切尋找可提供關鍵情報嘅人。

不過，前FBI高級官員 蒙托亞（Frank Montoya Jr.）就「大安旨意」咁表示，話佢唔點擔心訓練有素嘅情報官會出賣國家，反而係其他政府機構員工「更易成為目標」。佢話：如果涉及智慧財產權、敏感科技，甚至電網、金融系統，一名憤怒嘅國稅局雇員或社會服務局員工，恐比一個CIA間諜更具威脅。

蒙托亞續指：過去25年來，我哋可以見到「中俄」越來越將目標對準非軍事、非機密訊息，因為啲訊息可幫助佢哋升級軍隊、改善基礎設施。更重要嘅，社交網、求職網令外國間諜更易鎖定潛在目標。

蒙托亞指出：過去，蘇聯情報官需要耗費大量時間尋找潛在叛逃者，或等待對體制不滿嘅間諜主動聯繫。但而家，一個LinkedIn帳號可以快速篩選出「前國防部雇員」，輕易搵到「正在尋找工作」嘅前聯邦僱員。