根據台灣《中央社》21號報導，近排在中國有人以「香港大藥房」名義，在網上直播銷售中成藥，1個月獲利就超過港幣100萬，呢啲藥物並非港貨，而係來自中國 江西、福建等地嘅「貼牌貨」；兩間江西公司已被查封。

《星島日報》今引述廣州《南方週末報》訊息指，近月來，「香港大藥房」嘅官方直播間，每日都在抖音中直播，其販售嘅中成藥有「透骨膏、無濕輕、清肺丸、香腳王」等所謂嘅「港藥」。藥品更被冠上「香港大藥房」嘅名號，吸引唔少中國消費者。

呢啲自稱「港貨正品」嘅藥膏、噴劑、口服丸，實際發貨方為江西「贛益坊電子商務有限公司」及江西「和美藥業有限公司」，背後生產廠家來自多地，包括「江西、河北、河南、福建」等地。其產品既非藥、亦非港產，又係出廠價低嘅「貼牌貨」，而「香港大藥房」更加非香港持牌藥商。

據報，江西樟樹市監局15號曾派人赴「和美藥業」等涉案場核查，對涉案產品實施封令，同時令企業負責人通知合作方，立即停止線上經營活動。市監局表示，官方已立案調查，理由係涉嫌對商品作引人誤解之商業宣傳，欺騙、誤導消費者。