根據台灣陸資紅媒《旺報》20號報導，中國內部「個資買賣產業鏈」猖狂發展，只要有名，就可查出對家「手機號、身份證號、家庭地址」，甚至其名下財產資訊都可查。隨著近日「百度」副總 謝廣軍個囡陷入「開盒」爭議，多間中媒追查後發現，今次未成年人「開盒」事件背後，實際暗藏嘅係一條巨大嘅「私隱販售黑鏈」。

網路黑話「開盒」亦可稱「人肉開盒」，意指通過非法手段搜集他人隱私資訊，並將資訊公開在網上，引導網民進行肉搜網暴。該行為往往會對受害者造成巨大精神壓力及傷害。「百度」在19號就「謝廣軍囡囡開盒事件」發佈聲明，當中強調，開盒資訊非源自百度，而係來自海外社工庫。

先唔論「百度」撇清責任嘅聲明「真實與否」，不過其所謂嘅「社工庫」究竟係乜？「社工庫」全稱「社會工程學資料庫」，係駭客通過攻擊網、欺詐用戶等手段，獲取大量個人隱私資料，再整合分析、集中歸檔所形成嘅資料庫。進而產生透過「社工庫」等不法管道獲取私人資訊，再經網上售賣牟利嘅「黑色產業鏈」。

據《藍鯨新聞》報導，透過登錄一間名為「巨人社工庫」嘅交易平台可發現，該平台營運數據顯示，每月活躍用戶量已突破18萬，甚至有公示價目表顯示，個人戶籍1日出單、查詢價格80蚊人紙；婚姻記錄1至3日出單、查詢價350蚊；外賣記錄1日出單、查詢價750蚊；人身軌跡2至7日出單、查詢價5000蚊；微信好友提取7日出單、查詢價9700蚊等細節。

該平台甚至有智慧化查詢系統，使用者只需輸入姓名等資訊，就可查詢各種想要嘅隱私資訊。只要願意付費，使用者輸入嘅資訊越詳細，輸出嘅隱私越精確。呢類商家通常在網上偽裝成普通用戶，通過發帖形式吸引買家。

其中有賣家表示，查名下車800蚊，查房產1700蚊，查銀行卡餘額800蚊，查開房記錄9000蚊，查詢時間跨度可達5年。事實上，非法利用社工庫開盒嘅個案「並不少見」。《央視》報導指出，今年1月杭州警方破獲一宗非法獲取個資，在網上「開盒」2000幾位網紅個資、散佈境外對話群中，再通過接廣告、付費調查等方式，獲利幾十萬嘅犯罪事件。