根據《自由亞洲電台》16號報導，香港特首 李家超及前財政司司長 曾俊華，周日分別在Facebook撰文，發表對香港嘅睇法。李家超引述電影《哪吒2》金句「若前方無路，我便踏出一條路」；曾俊華就指，在美國被問到香港是否仍為國際金融中心，佢形容「呢類問題都幾棘手」。

多次在Facebook「表忠」嘅 李家超，周日16號上晝再次發文，分享同太太睇電影《哪吒2》嘅感受。李家超指，電影有唔少淚點，令其感受到母愛偉大，並充分展示國家動畫快速發展。又指電影「看點」為配樂，由港青、音樂人以嗩吶、電結他等樂器添上「港風」。

佢並引述《哪吒2》金句「若前方無路，我便踏出一條路」，指哪吒精神激勵佢同團隊，在大力改革時將難題「無畏無懼逐個擊破，展現破局思維」。佢又稱香港有優秀影視文化產業，舊年《九龍城寨之圍城》、《破·地獄》大熱，望更多港產片走向世界。

與此同時，前財政司司長 曾俊華同在當日於Facebook講述近日在美嘅所見所聞。曾俊華指，上周在美國出席「香港投資公司年會」及探親，被移居洛杉磯港人問到「香港仲係咪個國際金融中心」，佢不諱言指「呢類問題都幾棘手」，我當然就「盡量為香港講好說話」。

曾俊華又指，移美港人自當地傳媒接收到嘅香港消息，多為比較負面嘅訊息，並不容易被說服。作為香港投資公司副主席，今次佢亦有在年會中分享香港最新情況，以及個人對全球宏觀經濟、地緣政治嘅展望。