根據《自由亞洲電台》12號報導，港府面對872億元財赤，繼長者「兩蚊乘車優惠」後，港官再一次向民生「開刀」。醫管局宣布自本月24號起，最多只會發放24星期嘅藥，若需要更多則會分階段配發。相對政府10個特首司局長辦公室預算，其開支不減反增，派藥新措施預計只可節約數千萬元開支。分析認為，公共醫療政策不可只考慮數字；前區議員亦批評，新安排對基層造成困擾。

醫管局宣布，會分階段推出新配藥安排，第一階段由本月24號起，所有出院病人、專科門診、普通科門診病人，最多只會配制24星期嘅藥；若需配更多，則會安排分階段配發。

醫管局表示，新措施係為減少不必要開支及用藥混亂；而最終目標係自今年第四季起，每次最多向病人處方8星期藥。對於部分「有需要時先服用」嘅藥，例如止痛藥、藥膏等，若醫生處方多於28日，醫管局只會派發四分之一。

醫管局總藥劑師 崔俊明表示，醫生可按臨床需要調整：因為上述藥品係「需要時先服食」，有機會唔會用到，未必日日要用，呢的藥如果醫生無指明，我哋只會派發25%嘅藥俾病人。

醫管局估計，在新安排下，慢性病藥物分發量會減少一成，其他藥物可派少六成半，節省數以千萬元開支。聯網服務總監 鄧耀鏗指，現時政府對公院病人嘅藥費資助率高達92%，佢認為，社會可討論調整收費。

鄧耀鏗表示，病人每16個星期取藥，我哋嘅收費係15蚊，有冇空間調整？調整後等於我哋有更多資源，望將部分有臨床效益，甚至較昂貴嘅藥物，引入醫管局藥物名冊。

醫管局雖冇說明今次措施是否同政府「減赤」有關，但前區議員 李文浩則批評，新安排對基層造成困擾，佢不滿指：點解要向呢件事開刀？政府並非冇其他方式可削減開支，啲老人家每次出門口取藥，對佢哋來講都有風險，並非每個基層家庭都可聘請看護。

報導指，港府財赤高達872億元，但政府部門開支預算中，10個特首及高官辦公室嘅年度預算，增幅介乎1.1%至20.4%不等，其中政制局增幅高達20.4%，達到1650萬；特首辦亦增加7.8%預算至1.27億元。警務處再創新高，預算逾280億元，增幅為4.94%。

相對醫管局新措施只可節約幾千萬，財經評論員 利世民認為，醫管局不可只考慮數字。利世民話，該政策已非單純財政考慮 ，作為公共醫療政策，該做法是否真係對病人最好？慳錢效果並非十分明顯，甚至最後要用更多人手去處理drug review（藥物評估），加上重新派藥嘅手續，恐得不償失。

李文浩亦認為，政府應削減其他開支：警務處增加開支有乜用? 現時在香港仲可以遊行示威咩？而家警務處增加開支嘅唯一用途，就係在街上放大量人手去增加抄牌。佢認為，政府與民為敵，制定出來嘅政策只會令市民生活狀況更加糟糕。