根據台灣《中央社》13號報導，香港上市企業「新世界發展」近年出現財政問題，據報，中國監管機構已指示4大國有銀行，支持呢間財困嘅「愛國企業」。

「新世界」係大型港企之一、經營多元，創辦人 鄭裕彤在2016年逝世前，在香港富豪榜排名為第三，僅次於 李嘉誠、李兆基；新世界家族一直同北京領導關係良好，被視為「愛國港企」之一。

「新世界」近期傳出財政問題，早前有外電報導指，集團曾以房產作抵押。據香港《信報》今日報導，信貸情報及資料供應商「Octus」引述知情人士透露，傳中國4大國銀收到指示，要研究為新世界提供額外融資支持。

報導指，中國監管機構上月召開會議，要求「建行、農行、工行、中行」維持對新世界嘅現有信貸額度，並尋找向新世界提供額外融資嘅途徑。上述銀行正查核目前對新世界嘅風險敞口，並評估敞口可能增加嘅後果。

據悉，中國政府官員已同新世界主席 鄭家純會談，敦促佢避免新世界進行債務重組，因高層擔心此舉將加劇房地產行業低迷嘅局面。報導表示，新世界及4大國銀都未有回應有關Octus 嘅查詢。

Octus日前曾透露，新世界上月中向銀行提交再融資建議，尋求將今、明兩年到期嘅全部無抵押貸款，轉為港幣600億元嘅3年期抵押貸款，並以近港幣1200億嘅抵押品作保，望在上半年內完成。

新世界二代接班人 鄭家純，曾任中國全國政協常務委員，三代接班人為 鄭志剛。網上資料顯示，新世界業務包括「房地產、酒店、基建、醫療健康、百貨」等，在中國亦有唔少大規模投資。

截至2023年底，該集團資產總值為港幣4702億元，在中國投資超過165億美元。截至今日下晝2點，新世界股價報港幣5.16元，市值港幣129億元。舊年10月，新世界股價為港幣10.5元，自傳出財困後，股價持續滑落近腰斬。