根據台灣《中央社》10號報導，48歲的中國知名材料學者、浙江大學教授 劉永鋒在5號猝逝，事後網上流傳一封 劉永鋒遺孀嘅公開信，信中直指過去一年 劉永鋒「近乎瘋狂嘅工時」，並呼籲正視中國各大學「中青科研員過勞」等問題。

《澎湃新聞》9號報導，劉永鋒因突發疾病經醫治無效於5號過世。劉永鋒主要從事「儲氫材料及鋰離子電池電極材料設計、合成及其性能調控」等領域嘅基礎理論及應用研究。

劉永鋒過世後，網上流傳一封其妻嘅公開信，題為「劉永鋒教授愛人籲關注高校科研工作者過勞問題」。信中提到，劉永鋒1月21號在西安出差嘅會議現場突發腦溢血，於3月5號離世，呢封信要為「18年來如一日」持續高強度工作致突發腦溢血嘅 劉永鋒，討一個公正說法，為眾多在一線「沒日沒夜苦幹」嘅中青科研員發聲。

信中提到，劉永鋒出事後，家人攞返其工作電腦，查看舊年3月起至出事前其車輛進出「浙大」嘅詳細紀錄，並透過鐵路購票紀錄及各航空公司軟體，復原其近一年中「觸目驚心、近乎瘋狂」嘅工作時長。信中列出其工作時間，其中有105日係夜晚10點後先放工，出差日總數達135日，實際工作319日。

信中並表示，高校中青年科研工作者嘅過勞狀況「普遍存在」，希望 劉永鋒嘅努力可以得到公正對待，更希望學校及社會建立起保障科研工作者健康嘅有效體系，唔好再發生類似悲劇。

《星島日報》引述中國自媒體「學人Scholar」指，據不完全統計，舊年有41名62歲以下中國學者過世，其中最年輕嘅僅31歲。導致過世嘅原因複雜，由於近年生存環境「內捲嚴重」，唔少青年學者為應對「非升即走」嘅壓力及教學科研任務，工時普遍超長。