根據香港《Yahoo 財經》4號報導，港府最新一份財政預算案中「對停賣住宅地隻字不提」，未來每年仍有近2萬伙供應。已退出政壇嘅前自由黨主席 田北俊近日接受電台訪，佢建議政府應停售住宅地兩年，以及吸引移英港人回流香港，藉以穩住樓價；對於 陳茂波指樓價已經見底，田北俊大表震驚，但認同高官應帶頭「撈底」，增強市民入市信心。

過去多年，賣地一直係港府重要收入來源，但觀乎各大發展商對重頭項目北部都會區反應冷淡。田北俊在《商台》周一晚節目《光明頂》中指，所謂「由治入興」後香港經濟難以復甦，與樓市低迷息息相關。

佢並指出，高利率迫使地產商減價賣樓，致全港105萬個單位小業主身家縮水四成，中產「無錢」又「無癮」，紛紛北上深圳或日本消費，削弱香港經濟活動。

最新財政預算案雖指出將暫停出售商業地，但未來每年仍有約1.9萬住宅新供應，四年內潛在供應達10.7萬伙，供應源源不絕。田北俊認為，政府要同時停止出售住宅地「托市」，令樓市唔會「落得咁緊要」，否則發展商掟貨，百萬業主財富再萎縮，難以搞旺香港。

田北俊又表示，在「恒大、碧桂園」等相繼出事後，多地政府近年已停止賣地，佢質疑：為何港府不可以？對於政府仍將土地放置於勾地表，佢稱此舉令「土地主導權唔在政府」，田氏指正確做法應要宣布停止賣地，釋出政府「不欲地價再跌」嘅明確訊息。

對於 陳茂波在回答立法會議員提問時指「香港住宅樓價已經見底」，田北俊大表震驚指：我奇怪點解會有咁嘅分析，話今日嘅住宅係見底，如果係見底，不如政府買晒佢就賺錢！佢並建議港府可購入新世界未售物業，幾年後再售出以獲利，就似當年亞洲金融風暴港府打大鱷一役，但佢相信政府冇呢個膽。

回顧歷史，1997年「大鱷」索羅斯追擊港元，為免港股急插，當時由 曾蔭權領導嘅港府財金官員，決定利用儲備掃入1,200億元港股擊退炒家，並在1999年將購買嘅港股「以盈富基金上市」，分批向市場出售，若長揸25年總回報將達2.8倍。

對於節目主持表示「司局級官員應帶頭入市」，愛香港就應帶頭掃貨，其財富最入可以購入兩個太古城、將軍澳屋苑單位，見底不買就「好老襯」。田北俊對此表示認同，並認為係個「好建議」，並指：如果佢哋高官肯買，就係顯示樓市已見底。

早前有東涌住宅地皮僅以每方呎1,500元批出，震憾市場，田北俊坦言，過去其個人有錢、有信心時，都會嘗試入標。佢指出：幾億元我都投得起啦，彩你都傻呀而家，費事投𠻹呀！

田生並分析指：該地皮流標後再減價出售，政府予人渴求賣地感覺，但成交價令市民「腳軟」，皆因地價加上建築費只係每方呎8,000幾元，東涌同區二手樓最終會跌至呢個水平。佢形容：對已經在東涌置業嘅中產「好慘咯」，點會有消費嘅興趣及能力。

被問及目前仲有邊個會入市買樓？田北俊指，內地專才帶錢到香港仍有限制，暫時難以成為市場支柱；另一批潛在買家係移英港人，當中有好多醫生、老師等專業人士，建議政府吸引佢哋回流。

佢以自身經驗為例指，佢自己嘅孫都在英國讀書，下晝4、5點就已天黑又成日落雨，有乜咁好住？不如返港啦！

田北俊又認為，政府應向國際市場傳達清晰訊息，強調修例事件應「告一段落」，港府唔擔心再有人「搞搞震」，咁樣先有機會重建外國人投資香港嘅信心。並指自己仍有好多資產在港，唔希望香港整體經濟繼續惡化。