廉政署接獲2058宗貪污投訴!警務處最多

根據香港《Yahoo 新聞》3號報導,香港廉政公署舊年接獲2,058 宗貪污投訴,較2023年上升3%,其中政府部門佔480宗,公共機構佔140宗,私營機構佔1,438宗。錄得最多貪污投訴嘅政府部門係 警務處,有108宗,較2023年增4%,其次係懲教署及食環署,分別錄得44及40宗。

 

負責監督廉政公署工作嘅四個獨立諮詢委員會,今日3號舉行新聞簡報會,匯報舊年工作概況。撇除選舉投訴,廉署舊年接獲2,058宗貪污投訴,當中1,636宗為可追查投訴。涉及政府人員的貪污投訴共480宗,較前年上升6%。

 

舊年有207人被檢控,包括16名公務員,其中119人被定罪。廉署轉介64名政府人員,涉及31宗案件,等相關決策局及部門考慮作紀律處分及行政處理。

 

廉署數字顯示,錄得最多嘅貪污投訴嘅政府部門為 警務處,舊年錄得108宗,較前年104宗增4%。其次為 懲教署,舊年錄得44宗,較前年18宗大幅增加144%。至於 食環署則由前年61宗下跌至40宗,跌幅為34%。

 

公共機構方面,錄得最多貪污投訴嘅係 醫管局,有25宗,較前年上升1宗。其次係 港鐵,舊年錄得15宗貪污投訴,較前年4宗增加超過兩倍;而排第三嘅係 賽馬會,舊年錄得12宗貪污投訴,較前年4宗增加兩倍。

 

審查貪污舉報諮詢委員會主席 陳智思表示,廣大市民對政府人員嘅誠信及問責要求極高,委員會欣悉整體公務員隊伍保持廉潔守正,而集團式貪污亦未有死灰復燃跡象。就個別害群之馬嘅貪污及不當行為,廉署已及時雷厲打擊。

 

被問到涉及 懲教署、港鐵、馬會嘅貪污投訴明顯增加,陳智思話:投訴不代表檢控,可能受唔同原因增加或減少,舊年冇涉及懲教署嘅檢控,大部分有關 港鐵、馬會嘅貪污投訴涉及行政人事管理,不涉及服務。

 

陳智思認為,多人投訴對於政府、公共及私營機構係一種壓力及監察,屬好事,但市民未必全面知道政府及機構嘅整體運作,蒐證恐涉及境外因素而增加難度,強調本港未出現廉潔文化改變或系統性問題,亦冇集團式貪污。

發佈時間: 2025年03月03日 18:39
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.